મહેસાણા જિલ્લાના કડી માર્કેટયાર્ડ તેમજ વિજાપુરની જૂની આઈટીઆઈ વિસ્તારમાંથી સ્થાનિક પુરવઠા વિભાગની ટીમોએ બાતમીના આધારે લાખોની કિંમતનો સરકારી અનાજનો જથ્થો વાહનોમાં સગેવગે થાય તે અગાઉ ઝડપી પાડ્યો હતો. ઉપરોક્ત બન્ને સ્થળોથી જપ્ત કરાયેલા ઘઉં અને ચોખાના સરકારી જથ્થો તેમજ વાહનો સીઝ કરી જવાબદારો સામે વધુ કાર્યવાહી હાથ ધરી હતી. ઉલ્લેખનીય  છે કે, કડી APMCની આ પેઢીમાંથી બીજી વખત સરકારી અનાજનો જથ્થો મળી આવતાં પુરવઠા તંત્ર પણ ચોંકી ઉઠ્યું હતું.

કડી APMCમાં આવેલી જય યોગેશ્વર ટ્રેડિંગ કંપની નામની પેઢી જરૂરિયાતમંદ રેશનકાર્ડ ધારકોને અપાતા સરકારી અનાજનો જથ્થો મોટાપાયે ખરીદ-વેચાણ થતો હોવાની બાતમીના આધારે ગુરુવારે સવારે મામલતદાર કચેરી તેમજ જિલ્લા કક્ષાની પુરવઠાની ટીમોએ અચાનક દરોડો પાડી તપાસ હાથ ધરી હતી. પુરવઠાની ટીમોને આ પેઢી તેમજ એક આઈસર, ટેમ્પો, CNG રિક્ષા તેમજ વેગન-આર કારમાંથી સરકારી અનાજનો જથ્થો ઝડપી પાડ્યો હતો. 

પુરવઠાની ટીમોએ મોડી સાંજ સુધી તપાસ હાથ ધરી રૂ. ૭,૧૯,૯૬૩ની કિંમતના ૧૮,૪૬૦ કિ.ગ્રા. ચોખા, રૂ. ૩,૬૧,૧૨૫ની કિંમતના ૧૩,૩૭૫ કિ.ગ્રા. ઘઉં, રૂ. ૫૫,૧૪૬ની કિંમતનું ૧૪,૧૪૧ કિ.ગ્રા. છુટ્ટુ અનાજ, અંદાજે રૂ. ૮ લાખની આઈસર ટ્રક, એક લાખની કિંમતનો ટેમ્પો, રૂ. ૮૦ હજારની કિંમતની CNG રિક્ષા તેમજ બે લાખના કિંમતની વેગન-આર કાર મળી કુલ રૂ. ૨૩.૧૬ લાખની કિંમતનો મુદ્દામાલ જપ્ત કર્યો હતો. 

ઉપરાંત વિજાપુરમાં મહેસાણા-હિંમતનગર હાઈવે સ્થિત નવી બંસરી હોટલની પાછળના ભાગે આવેલી જૂની આઈટીઆઈમાં આવેલા એક ગોડાઉનમાં સરકારી અનાજનો શંકાસ્પદ જથ્થો સંગ્રહ કરી ફલોર મીલમાં મોકલાઈ રહ્યો હોવાની બાતમીના આધારે મામલતદાર કચેરીની પુરવઠા ટીમે દરોડો પાડ્યો હતો. દરોડા દરમિયાન ઉપરોક્ત ગોડાઉનમાંથી ત્યાં ઉભેલા ટ્રકમાં ઘઉં અને ચોખાનો જથ્થો ભરાતો હતો. આ જથ્થા અંગે વેચાણ-ખરીદના બીલો માંગવામાં આવતા આપવામાં ગોડાઉનનો સંચાલક નિષ્ફળ નિવડ્યો હતો. છેવટે પુરવઠાની ટીમે તપાસ કરી અંદાજે ૩૮ હજાર કિ.ગ્રા. ચોખા અને ૧૨ હજાર કિ.ગ્રા. ઘઉંનો જથ્થો સીઝ કરી વધુ કાર્યવાહી હાથ ધરી હતી. 

કડીમાંથી ઝડપાયેલો મુદ્દામાલ

જથ્થાનું નામ    મુદ્દામાલ    કિંમત

ચોખા    18460 કિ.ગ્રા.    રૂ. 7,19,963

ઘઉં    13375 કિ.ગ્રા.    રૂ. 3,61,125

છુટક અનાજ    14141 કિ.ગ્રા.    રૂ. 55,146

આઇશર ગાડી    નંગ-1    રૂ. 8 લાખ

ટેમ્પો(છકડો)    નંગ-1    રૂ. 1 લાખ

સીએનજી રિક્ષા    નંગ-1    રૂ. 80000

વેગનઆર ગાડી    નંગ-1    રૂ. 2 લાખ

કુલ                                રૂ. 23,16,234