અમદાવાદ:અમદાવાદના એક ૩૨ વર્ષીય વ્યક્તિ પર લગ્નના ખોટા વચનો આપીને સેક્સ વર્કર પર બળાત્કાર કરવાનો આરોપ મૂકવામાં આવ્યો હતો. નીચલી કોર્ટે તેમને રાહત આપવાનો ઇનકાર કરી દીધો છે. કોર્ટે આ કેસમાં આરોપીઓની દલીલો ફગાવી દીધી હતી અને રાહત આપવાનો ઇનકાર કર્યો હતો.

પૂર્વ અમદાવાદના રહેવાસી આ પુરુષ પર ૨૦૨૩ માં નરોડા પોલીસે બળાત્કાર, હુમલો અને ગુનાહિત ધાકધમકીનો આરોપ મૂક્યો હતો. આ ફરિયાદ પશ્ચિમ બંગાળની એક મહિલા દ્વારા દાખલ કરવામાં આવી હતી, જે ૨૦૨૧ માં અહીં વેશ્યાવૃત્તિ માટે આવી હતી. સેશન્સ કોર્ટે તેને આગોતરા જામીન આપ્યા હતા, કારણ કે તે થોડા વર્ષોથી મહિલા સાથે રહેતો હતો અને તેમના સંબંધોમાં ખટાશ આવ્યા બાદ ફરિયાદ દાખલ કરવામાં આવી હતી. જ્યારે તે વ્યક્તિએ કેસથી છુટકારો મેળવવાનો પ્રયાસ કર્યો અને કહ્યું કે, તેઓ લાંબા સમયથી સંબંધમાં છે અને બળાત્કારનો આરોપ તેના પર લાગુ પડતો નથી, ત્યારે ફરિયાદીએ તેની અરજીનો વિરોધ કર્યો હતો.

ફરિયાદીએ જણાવ્યું હતું કે, રેકોર્ડ પર મૂકવામાં આવેલા પુરાવાઓની શરૃઆતના તબક્કામાં આરોપો ઘડવા માટે જ તપાસ કરવામાં આવશે. આરોપી અને પીડિતા વચ્ચે શારીરિક સંબંધ હતો. જોકે, પીડિતાનો આરોપ છે કે, આરોપીએ લગ્નનું ખોટું વચન આપીને તેની સાથે ઘણી વખત શારીરિક સંબંધ બાંધ્યા હતા અને તે વચન પૂરું કર્યું ન હતું. આવી સ્થિતિમાં, આરોપી સામે આરોપો ઘડવા માટેનો કેસ બનાવવામાં આવે છે. આરોપીના વકીલે અરજીમાં પીડિતાની દલીલોનો વિરોધ કર્યો હતો. તેમણે કહ્યું કે, પીડિતાના નિવેદન મુજબ, તે વેશ્યાવૃત્તિ માટે અમદાવાદ આવી હતી. આ પછી, આરોપી ગ્રાહક તરીકે તેના સંપર્કમાં આવ્યો હતો. પછી તેમની વચ્ચે સંબંધ બનાવ્યો હતો. કોર્ટે પોલીસે નોંધેલા પીડિતાના નિવેદનની પણ સમીક્ષા કરી, જેમાં તેણીએ વિગતવાર સમજાવ્યું કે, તે અમદાવાદ કેવી રીતે આવી અને નાના ચિલોડાની એક હોટલમાં કેવી રીતે રોકાઈ, આરોપી ગ્રાહક તરીકે તેને કેવી રીતે મળવા આવ્યો અને થોડા મહિના પછી તેની સાથે લગ્ન કરવાનું વચન આપ્યું. તેઓ એકબીજાના પરિવારોને મળ્યા અને સાથે ગોવા પણ ગયા હતા. જ્યારે તે વ્યક્તિ પશ્ચિમ બંગાળમાં તેના પરિવારને મળવા ગયો, ત્યારે તેમની વચ્ચે ઝઘડો થયો હતો. સુનાવણી પછી, એડિશનલ સેશન્સ જજ એમ બી કોટકે આરોપીની અરજી ફગાવી દીધી અને કહ્યું કે, આરોપો ઘડવાના તબક્કે, સામગ્રીનું મૂલ્યાંકન મર્યાદિત હેતુ માટે થવું જોઈએ. આ કિસ્સામાં, જો પીડિતાનું નિવેદન એવું હોય કે, આરોપીએ લગ્નના ખોટા વચન પર તેની સાથે શારીરિક સંબંધ બાંધ્યા હતા અને પછીથી તે વચન તોડી નાખ્યું હતું અને જો આરોપી આ નિવેદનનો ઇનકાર કરે છે અને તેનો બચાવ સ્વીકાર્ય ન લાગે છે - તો એવું માની શકાય નહીં કે, આરોપીએ ગુનો કર્યો નથી.