અમદાવાદ: ગુજરાત હાઈકોર્ટે 2002ના ગોધરા ટ્રેન હુમલા દરમિયાન ફરજમાં બેદરકારી દાખવવા બદલ નવ પોલીસ કોન્સ્ટેબલને બરતરફ કરવાના નિર્ણયને માન્ય રાખ્યો છે. આ હુમલામાં સાબરમતી એક્સપ્રેસના એસ-6 કોચમાં 58 મુસાફરો જીવતા ભડથું થઈ ગયા હતા. કોર્ટે તેમની બરતરફીને પડકારતી તેમની અરજીઓને ફગાવી દેતાં કહ્યું કે બેદરકારીના કારણે ટ્રેનમાં તેમની ગેરહાજરીએ ગોધરા કાંડમાં મહત્વની ભૂમિકા ભજવી હતી. આ સાથે કોર્ટે એમ પણ કહ્યું કે જો તેઓ સાબરમતી ટ્રેનમાં હાજર હોત તો ગોધરા કાંડને રોકી શકાયો હોત.
જસ્ટિસ વૈભવી ડી. નાણાવટીએ પોતાના ચુકાદામાં કહ્યું કે અરજદારોએ રજિસ્ટરમાં ખોટી એન્ટ્રી કરી અને શાંતિ એક્સપ્રેસથી અમદાવાદ પાછા ફર્યા. જો કોન્સ્ટેબલ અમદાવાદ પહોંચવા માટે સાબરમતી એક્સપ્રેસ ટ્રેનથી જ રવાના થયા હોત, તો ગોધરામાં થયેલી ઘટનાને રોકી શકાયો હોત. કોર્ટે નોંધ્યું કે અરજદારોએ તેમની ફરજમાં બેદરકારી અને ગફલત દાખવી છે. કોર્ટે કહ્યું કે તેમના વિરુદ્ધ આરોપો સાબિત થઈ ચૂક્યા છે અને આ જ આધારે તેમને હટાવવાનો આદેશ પસાર કરવામાં આવ્યો છે. જો કે, એ પણ સ્પષ્ટ કરવામાં આવ્યું છે કે અરજદારો પર કોઈ ગુનાહિત કાવતરામાં સામેલ હોવાનો આરોપ નથી લગાવવામાં આવ્યો.
કેવી રીતે થઈ બેદરકારી?
ગોધરા કાંડ 27 ફેબ્રુઆરી 2002ના રોજ ગુજરાતના ગોધરા રેલ્વે સ્ટેશન પર થયો હતો. જેમાં ભીડે સાબરમતી એક્સપ્રેસના એસ-6 કોચમાં આગ લગાવી દીધી હતી. ત્યારબાદ સમગ્ર ગુજરાતમાં રમખાણો ફાટી નીકળ્યા હતા. અરજદારો, જેમાં ચાર બિનહથિયારી કોન્સ્ટેબલ અને પાંચ હથિયારી કોન્સ્ટેબલનો સમાવેશ થાય છે, ગુજરાત રેલ્વે પોલીસના મોબાઇલ સ્ક્વોડનો ભાગ હતા. 26-27 ફેબ્રુઆરીના રોજ તેમની ડ્યુટી લાગી હતી જેમાં તેમને અમદાવાદથી દાહોદ સુધી રાજકોટ ભોપાલ એક્સપ્રેસમાં પેટ્રોલિંગ કરવાની હતી અને પછી સાબરમતી એક્સપ્રેસથી પાછા આવવાનું હતું. જો કે, જ્યારે તેઓ દાહોદ પહોંચ્યા ત્યારે તેમને ખબર પડી કે સાબરમતી એક્સપ્રેસ મોડી ચાલી રહી છે. આવી સ્થિતિમાં ટ્રેનની રાહ જોવાને બદલે તેઓ શાંતિ એક્સપ્રેસથી પાછા ફર્યા. એટલું જ નહીં, તેમણે સ્ટેશન ડાયરીમાં ખોટી એન્ટ્રી પણ કરી કે તેઓ સાબરમતી એક્સપ્રેસથી પાછા આવ્યા છે. તેની अगली સવારે હુમલો થયો હતો.
તમને જણાવી દઈએ કે ગોધરા કાંડ બાદ કોન્સ્ટેબલ ગુલાબસિંહ ઝાલા, ખુમાનસિંહ રાઠોડ, નાથાભાઈ ડાભી, વિનોદભાઈ બીજલભાઈ, જાબિર હુસૈન શેખ, રસિકભાઈ પરમાર, કોશોરભાઈ પરમાર, કિશોરભાઈ પાટની અને પુનાભાઈ બારિયાને 1 માર્ચ, 2002ના રોજ સસ્પેન્ડ કરવામાં આવ્યા હતા અને બાદમાં ફરજમાં બેદરકારી દાખવવાના આરોપમાં ચાર્જશીટ આપવામાં આવી હતી. આ મામલે વિભાગીય તપાસ બાદ તેમને 2005માં બરતરફ કરવામાં આવ્યા હતા અને આ નિર્ણયને પુનરીક્ષણ અધિકારીઓએ યથાવત રાખ્યો હતો. ત્યારબાદ હાઈકોર્ટે આ આદેશોને પડકારતી તેમની અરજીઓ પર સુનાવણી કરી હતી. જો કે હવે હાઈકોર્ટે પણ અરજીઓ ફગાવી દીધી છે.