અમદાવાદ : અમદાવાદ ક્રાઈમ બ્રાન્ચે ખોટા દસ્તાવેજોના આધારે પાસપોર્ટ બનાવતી એક ગેંગને ઝડપી પાડી છે. આ કાર્યવાહીમાં એક બાંગ્લાદેશી મહિલાનો પણ સમાવેશ થાય છે, જેણે કથિત રીતે ખોટા પુરાવા રજૂ કરીને ભારતીય પાસપોર્ટ મેળવ્યો હતો. ક્રાઈમ બ્રાન્ચે આ મહિલા વિરુદ્ધ કાયદેસરની કાર્યવાહી હાથ ધરી છે.
પોલીસ તપાસમાં સામે આવ્યું છે કે આ ગેંગે અન્ય ત્રણ મહિલાઓના પાસપોર્ટ પણ ખોટા દસ્તાવેજોના આધારે બનાવ્યા હોવાની આશંકા છે. હાલમાં ક્રાઈમ બ્રાન્ચ આ કેસમાં સંડોવાયેલા ચાર શંકાસ્પદ લોકોની સઘન પૂછપરછ કરી રહી છે, જેથી આ સમગ્ર કૌભાંડની ઊંડી તપાસ થઈ શકે અને અન્ય લોકોની સંડોવણી પણ બહાર આવી શકે. પોલીસનું માનવું છે કે આ ગેંગ ઘણા સમયથી આ પ્રકારે ખોટા દસ્તાવેજો બનાવી પાસપોર્ટ મેળવવાનું નેટવર્ક ચલાવી રહી હોઈ શકે છે. આ ઘટનાને પગલે પાસપોર્ટ બનાવવાની પ્રક્રિયામાં વધુ સઘન તપાસ અને સુરક્ષા પગલાં લેવાની જરૂરિયાત ઊભી થઈ છે.