અમદાવાદ : ગુજરાત રાજ્યમાં કોવિડ-19 ના કેસોમાં ફરી એકવાર સામાન્ય ઉછાળો જોવા મળ્યો છે. આજે, 4 જૂન, 2025 ના રોજ, રાજ્યભરમાં કોવિડ-19 ના 119 નવા કેસ નોંધાયા છે. આ નવા કેસો સાથે, રાજ્યમાં કુલ એક્ટિવ કેસની સંખ્યા 508 પર પહોંચી ગઈ છે, જેમાંથી 18 દર્દીઓ હોસ્પિટલમાં સારવાર લઈ રહ્યા છે જ્યારે 480 દર્દીઓ હોમ આઇસોલેશનમાં છે. અત્યાર સુધીમાં કુલ 72 દર્દીઓને ડિસ્ચાર્જ કરવામાં આવ્યા છે, અને સદનસીબે, આજે કોઈ મૃત્યુ નોંધાયું નથી.

વર્તમાન સ્થિતિ અને વેરિઅન્ટ્સની માહિતી
રાજ્યમાં કોવિડના કેસોમાં દર 6 થી 8 મહિને સામાન્ય વધારો જોવા મળતો હોય છે, તેથી આ ઉછાળાથી ગભરાવાની જરૂર નથી. આરોગ્ય વિભાગ દ્વારા "સાવચેતી એ જ સમજદારી છે" ના સંદેશ સાથે નાગરિકોને સાવધ રહેવા જણાવ્યું છે.

કોવિડ પોઝિટિવ દર્દીઓના જીનોમ સિક્વન્સિંગ ટેસ્ટિંગ GBRC ગાંધીનગર ખાતે કરવામાં આવે છે. આ ટેસ્ટિંગમાં મુખ્યત્વે JN.1, LF.7, LF.7.9 અને XFG Variant જોવા મળ્યા છે. WHO (વર્લ્ડ હેલ્થ ઓર્ગેનાઈઝેશન) ના ધારાધોરણ મુજબ, આ તમામ વેરિઅન્ટ 'વેરિઅન્ટ ઓફ ઇન્ટરેસ્ટ' (Variant of Interest) ની શ્રેણીમાં આવે છે, જે સામાન્ય પ્રકારના છે અને તેનાથી ગભરાવાની જરૂર નથી.

આરોગ્ય તંત્રની સૂચનાઓ અને સાવચેતીના પગલાં
રાજ્યના આરોગ્ય તંત્ર દ્વારા નાગરિકોને કોવિડ એપ્રોપ્રિએટ બિહેવિયરનું (Covid Appropriate Behavior) પાલન કરવા માટે ભારપૂર્વક અપીલ કરવામાં આવી છે.