કડી-વિસાવદર પેટાચૂંટણી માટે ભાજપે સ્ટાર પ્રચારકોની યાદી કરી જાહેર
મુખ્યમંત્રી ભુપેન્દ્રભાઇ પટેલ, પ્રદેશ પ્રમુખ સી.આર. પાટીલ, પૂર્વ મુખ્યમંત્રી વિજય રૂપાણી, નીતિન પટેલ, મનસુખ માંડવિયા, પુરુષોત્તમ રૂપાલા, જીતુ વાઘાણી સહિતના દિગ્ગજ નેતાઓના નામ
અમદાવાદ તા.૫: ગુજરાતના કડી અને વિસાવદર વિધાનસભા મતવિસ્તારોમાં આગામી ૧૯ જૂન, ૨૦૨૫ના રોજ યોજાનારી પેટા ચૂંટણી માટે રાજકીય ગરમાવો વધ્યો છે. ભાજપે બંને બેઠકો માટે પોતાના ઉમેદવારોના નામની જાહેરાત કરી છે અને સાથે જ સ્ટાર પ્રચારકોની યાદી પણ જાહેર કરી છે.
ભાજપે કડી વિધાનસભા માટે જૂના જનસંઘી નેતા રાજેન્દ્રભાઈ દાનેશ્વર ચાવડાને મેદાનમાં ઉતાર્યા છે. તેમની પસંદગી ભાજપના હાઇકમાન્ડે કરી છે. રાજેન્દ્ર ચાવડા કડી વિસ્તારમાં ઓળખીતા ચહેરા છે અને તેમની નામઘોષણા થયા બાદ ચર્ચાનું કેન્દ્ર બની ગયા છે.
વિસાવદર બેઠક માટે કિરીટ બાલુભાઈ પટેલને ભાજપે ટિકિટ આપી છે. બંને ઉમેદવારોનો જાહેર જનતામાં મજબૂત સંપર્ક અને સંગઠનાત્મક ક્ષમતા ધરાવતી વ્યક્તિ તરીકે ગણના થાય છે.
ચૂંટણીને ધ્યાનમાં રાખી, ભાજપે ૪૦ સ્ટાર પ્રચારકોની સૂચિ પણ જાહેર કરી છે. જેમાં મુખ્યમંત્રી ભુપેન્દ્રભાઇ પટેલ, પ્રદેશ પ્રમુખ સી.આર. પાટીલ, પૂર્વ મુખ્યમંત્રી વિજય રૂપાણી, નીતિન પટેલ, મનસુખ માંડવિયા, પુરુષોત્તમ રૂપાલા, જીતુ વાઘાણી સહિતના દિગ્ગજ નેતાઓના નામ સામેલ છે. આ નેતાઓ બંને બેઠકો પર પાવરફુલ ચૂંટણી પ્રચાર માટે ઉતરશે.
ચૂંટણી પ્રચારના દિવસો જેમ જેમ નજીક આવશે તેમ તીવ્ર રાજકીય ચકચાર અને જનમેળાવાની રાજનીતિ વધુ તેજ થવાની સંભાવના છે. હવે સૌની નજર બંને બેઠકો પર ભાજપ પોતાના ગઢને કઈ રીતે મજબૂત કરે છે, તેની તરફ રહેશે.(૩૮.૭)
(9:49 AM IST)
છેલ્લા 8 દિવસમાં સૌથી લોકપ્રિય 
