અમદાવાદ, 7 જૂન, 2025: શહેરના એક વિસ્તારમાં ચોરીના ગુનામાં વોન્ટેડ આરોપીને ઝડપવા ગયેલી અમદાવાદ ક્રાઈમ બ્રાંચની ટીમને ફિલ્મી દ્રશ્યોનો સામનો કરવો પડ્યો હતો. પોલીસથી બચવા માટે આરોપીએ પાંચમા માળના ફ્લેટની બાલ્કની પર ચડી જઈને નીચે કૂદીને આપઘાત કરવાની ધમકી આપતા ભારે હાઈવોલ્ટેજ ડ્રામા સર્જાયો હતો. પોલીસ અને ફાયર ડિપાર્ટમેન્ટની કલાકોની જહેમત બાદ આખરે આરોપીને સુરક્ષિત રીતે ઝડપી પાડવામાં સફળતા મળી હતી.
પ્રાપ્ત માહિતી અનુસાર, અમદાવાદ ક્રાઈમ બ્રાંચ ચોરીના ગુનામાં સંડોવાયેલા આરોપી અભિષેકને ઝડપવા માટે તેના ફ્લેટ પર પહોંચી હતી. પોલીસને જોઈને અભિષેક ગભરાઈ ગયો હતો અને પોલીસ પકડથી બચવા માટે તેણે એક અનોખો તરકટ અજમાવ્યો હતો. તે તાત્કાલિક પાંચમા માળ પર આવેલા પોતાના ફ્લેટની બાલ્કની પર ચડી ગયો હતો અને ત્યાંથી જોર જોરથી બૂમો પાડવા લાગ્યો હતો કે જો કોઈ તેને પકડવાનો પ્રયાસ કરશે તો તે પાંચમા માળેથી નીચે કૂદીને આપઘાત કરી લેશે.
આરોપીના આ ફિલ્મી સ્ટંટથી પોલીસ પણ ચોંકી ઉઠી હતી. સ્થિતિ ગંભીર બનતા પોલીસે તાત્કાલિક ફાયર ડિપાર્ટમેન્ટને જાણ કરી હતી. દરમિયાન, આરોપી અભિષેક બાલ્કનીમાં લટકીને "હું મરી જઈશ, નીચે પડી જઈશ" તેવી ચીસો પાડી રહ્યો હતો, જેના કારણે આસપાસના લોકોના ટોળા પણ આ દ્રશ્યો જોવા માટે ઉમટી પડ્યા હતા. પોલીસે તેને સમજાવવાનો પ્રયાસ કર્યો, પરંતુ તે પોતાની જીદ પર અડગ રહ્યો હતો.
આરોપી અભિષેક માત્ર ચોરીના ગુનામાં જ નહીં, પરંતુ અગાઉ ફાયરિંગના ગુનામાં પણ સંડોવાયેલો હોવાનું પોલીસ તપાસમાં બહાર આવ્યું છે. પોલીસ અને ફાયર ડિપાર્ટમેન્ટના કર્મચારીઓએ સંયુક્ત રીતે કલાકો સુધી ચાલેલી મહામહેનત બાદ આખરે આરોપી અભિષેકને સુરક્ષિત રીતે નીચે ઉતારવામાં સફળતા મેળવી હતી અને તેને ઝડપી પાડ્યો હતો. આ ઘટનાને કારણે વિસ્તારમાં ભારે ચર્ચા જાગી હતી અને પોલીસની કાર્યવાહીની પ્રશંસા થઈ હતી.