ડભોઈ :  શિક્ષણને વિકાસ માટેનું સૌથી શક્તિશાળી સાધન માનનારા વડાપ્રધાન નરેન્દ્રભાઈ મોદીના નેતૃત્વ હેઠળ નવી શિક્ષણ નીતિ દ્વારા ભારતના ભવિષ્યના નાગરિકોને આધુનિકતા અને સંસ્કાર સાથે ઘડવાની દિશામાં મજબૂત પગલાં ભરાયા છે, તેમ મુખ્યમંત્રી ભૂપેન્દ્રભાઈ પટેલે સ્પષ્ટપણે જણાવ્યું છે. તેમણે ભારપૂર્વક કહ્યું કે, ભારતીય શિક્ષણ પદ્ધતિમાં જ્ઞાનની સાથે સંસ્કાર પણ અનિવાર્ય છે.
મુખ્યમંત્રી ભૂપેન્દ્રભાઈ પટેલે આજે વડોદરા જિલ્લાના ડભોઈ ખાતે નવનિર્મિત સ્વામિનારાયણ ગુરુકુળનું ઉદ્ઘાટન કરી વિદ્યારંભ કરાવ્યો હતો. આ પ્રસંગે અનેક સંતો, મહંતો અને મહાનુભાવો ઉપસ્થિત રહ્યા હતા.
પ્રાચીન પરંપરા અને આધુનિક શિક્ષણનું સમન્વય
મુખ્યમંત્રી ભૂપેન્દ્રભાઈ પટેલે જણાવ્યું હતું કે, પ્રાચીન ગુરુકુળ પરંપરામાં રાજકુમારો ઋષિ-મુનિઓ પાસેથી શિક્ષા અને દીક્ષા મેળવતા હતા. ભગવાન રામે વશિષ્ઠ અને વિશ્વામિત્ર મુનિ પાસેથી શિક્ષણ લીધું હતું, તો ભગવાન કૃષ્ણે સાંદીપની ઋષિ પાસેથી જ્ઞાન પ્રાપ્ત કર્યું હતું. એ જ ગુરુકુળ સંસ્કૃતિ આજે આધુનિક માધ્યમો સાથે ફરી પ્રાચીન પરંપરાને ઉજાગર કરી રહી છે.
તેમણે ઉમેર્યું કે, આજના સમયમાં આવી સંસ્થાઓ આપણી ગુરુકુળ પરંપરાને આધુનિકતાની સાથે જોડીને વિદ્યાર્થીઓને માત્ર શૈક્ષણિક જ્ઞાન જ નહીં, પરંતુ જીવન ઘડતર માટેની મૂલ્યનિષ્ઠ, સંસ્કારયુક્ત તાલીમ પણ આપી રહી છે. આધુનિક છાત્રાલય અને ટેક્નોલોજીથી સુસજ્જ આ સ્કૂલ કેમ્પસની સ્થાપનાથી શિક્ષણક્ષેત્રે એક નવી યાત્રા શરૂ થઈ છે. મુખ્યમંત્રીએ દ્રઢ વિશ્વાસ વ્યક્ત કર્યો કે, સ્વામિનારાયણ સંસ્થાનું આ ગુરુકુળ રાષ્ટ્રપ્રેમ, સંસ્કાર અને આધ્યાત્મના આધાર પર ઉજ્જવળ ભવિષ્ય માટેની પેઢી તૈયાર કરશે.
સરકારી યોજનાઓ અને શિક્ષણમાં ગુણવત્તાનો વિકાસ
મુખ્યમંત્રી ભૂપેન્દ્રભાઈ પટેલે જણાવ્યું કે, પ્રાચીન નાલંદા, તક્ષશિલા જેવી વિદ્યાપીઠોની પરંપરાને આગળ વધારતી નવી શિક્ષણ નીતિ હેઠળ વડાપ્રધાન નરેન્દ્રભાઈ મોદીએ સેક્ટર સ્પેસિફિક યુનિવર્સિટીઓની સ્થાપના કરી છે. પ્રથમવાર ભારતની પરંપરા સાથે સંકળાયેલી અને માતૃભાષા આધારિત શિક્ષણ વ્યવસ્થા અમલમાં આવી છે.
રાજ્ય સરકાર વડાપ્રધાન નરેન્દ્રભાઈ મોદીના માર્ગદર્શન હેઠળ શાળાઓમાં ગુણોત્સવ અભિયાન થકી ગુણવત્તામાં સુધારો લાવી રહી છે. કન્યા કેળવણી અને શાળા પ્રવેશોત્સવના માધ્યમથી દીકરીઓના શિક્ષણમાં ખાસ ધ્યાન આપવામાં આવ્યું છે.
પટેલે સગૌરવ જણાવ્યું કે, નમો લક્ષ્મી અને નમો સરસ્વતી યોજનાઓ દ્વારા વિદ્યાર્થીઓને વિજ્ઞાન પ્રવાહ તરફ પ્રોત્સાહન મળ્યું છે. માત્ર એક વર્ષમાં વિજ્ઞાન પ્રવાહમાં પ્રવેશ લેનાર વિદ્યાર્થીઓની સંખ્યામાં ૨૭ ટકાનો નોંધપાત્ર વધારો નોંધાયો છે. મિશન સ્કૂલ ઓફ એક્સલન્સ અને વિદ્યા સમીક્ષા કેન્દ્રના માધ્યમથી શિક્ષણમાં સ્ટાન્ડર્ડ અને ક્વોલિટી બંને બાજુ વિકાસ થયો છે.
વિકસિત ભારત અને અમૃત પેઢીનું આહ્વાન
પ્રધાનમંત્રી નરેન્દ્રભાઈ મોદીએ ૨૦૪૭ સુધી ભારતને વિકાસશીલ નહીં, પણ "વિકસિત ભારત" તરીકે સ્થાપિત કરવાનો સંકલ્પ લીધો છે. આ સંકલ્પ સાકાર કરવા માટે આપણે સૌએ શિક્ષિત, સંસ્કારયુક્ત અને સંકલ્પશીલ એવી "અમૃત પેઢી" ઘડવી પડશે, તેવું આહ્વાન મુખ્યમંત્રી ભૂપેન્દ્રભાઈ પટેલે કર્યું હતું.
તેમણે એમ પણ કહ્યું કે, સ્વામિનારાયણ ગુરુકુળ જેવી સંસ્થાઓ "એક પેડ માટે કેટ ધ રેન" અને "સિંગલ યુઝ પ્લાસ્ટિક વિમુક્તિ" જેવા વડાપ્રધાન નરેન્દ્રભાઈ મોદીએ શરૂ કરેલા પર્યાવરણ હિતના અભિયાનોમાં પણ મહત્વપૂર્ણ ભૂમિકા ભજવે છે.
ઓપરેશન સિંદૂરની સફળતા અને મહેમાનોના ઉદબોધન
મુખ્યમંત્રી ભૂપેન્દ્રભાઈ પટેલે પોતાના પ્રારંભિક ઉદબોધનમાં "ઓપરેશન સિંદૂર" ની અવિસ્મરણીય સફળતા બદલ વડાપ્રધાન નરેન્દ્રભાઈ મોદી તથા ભારતમાતાની રક્ષા માટે અપ્રતિમ શૌર્ય દર્શાવનાર ભારતીય સેનાના તમામ બહાદુર જવાનોને અભિનંદન પાઠવ્યા હતા. તેમણે કહ્યું કે, આ અભિયાન દ્વારા વડાપ્રધાન નરેન્દ્રભાઈ મોદીએ આતંકવાદ સામેની ભારતની લડાઈને એક નવી દિશા આપી છે અને રાષ્ટ્રરક્ષાનું એવું ઉદાહરણ પૂરું પાડ્યું છે જે ભવિષ્યની પેઢીઓને દેશસેવા માટે પ્રેરણા આપશે.
ધારાસભ્ય શૈલેષભાઈ મહેતાએ કહ્યું કે, દર્ભાવતી નગરીની તાસીર જોઈને, અહીં આવું સંસ્કારયુક્ત શિક્ષણ આપતું ગુરુકુલ એક અત્યંત જરૂરી બાબત બની ગઈ હતી. સંસ્થા સંચાલક કે. પી. સ્વામી અને નૌતમ સ્વામી તથા બાપુ સ્વામીના અધ્યક્ષ સ્થાને આ ગુરુકુલ આજે માત્ર ઉદ્ઘાટિત થયું નથી, પણ દર્ભાવતી નગરીના ભવિષ્ય માટે નવો અધ્યાય લખાયો છે. તેમણે મુખ્યમંત્રી ભૂપેન્દ્રભાઈ પટેલે દર્ભાવતી માટે વિશેષ પ્રેમ દાખવીને અનન્ય ગ્રાન્ટો અને વિકાસકારી યોજનાઓ આપવા બદલ તેમનો વિશેષ આભાર માન્યો હતો.
ભાવનગરના ધારાસભ્ય જીતુભાઇ વાઘાણીએ જણાવ્યું કે, સામાન્ય રીતે કોઈપણ શૈક્ષણિક સંસ્થા જ્યારે વ્યાવસાયિક લોકો ચલાવે ત્યારે તેમાં નફાકારક દૃષ્ટિકોણ હોય છે, પણ જ્યારે સંતો સંસ્થા ચલાવે છે, ત્યારે તેમાં સેવાના ભાવ સાથે સંસ્કારનો સાર હોય છે, એ વાતને સમાજે અનુભવેલી છે. તેમણે ઉમેર્યું કે, સ્વામિનારાયણ ગુરુકુળ સંસ્થા એ માત્ર શૈક્ષણિક સંસ્થા નથી, એ સંસ્કારનું ધામ છે. આવી આધુનિક ટેક્નોલોજીથી સુસજ્જ, સંસ્કારયુક્ત સંસ્થાઓ વિદ્યાર્થીઓને માત્ર ભણાવવામાં નહીં પરંતુ જીવવાની રીત શીખવવામાં યોગદાન આપે છે. વિદ્યાર્થીઓને અહીં આવવાનું મન થાય, અહીં ભણવાનું મન થાય અને ભણવાની સાથે ભારતીયતા, નૈતિકતા અને રાષ્ટ્રભાવના સાથે ઘડાવા મળે એ જ ગુરુકુલની સાચી સિદ્ધિ છે. નૌતમ સ્વામિએ સ્વામિનારાયણ ગુરુકુળની પ્રવૃત્તિની રૂપરેખા પ્રસ્તુત કરી હતી.
આ અવસરે કે. પી. સ્વામિ, હરિજીવન સ્વામિ, નિર્લેપસ્વરૂપ દાસ સ્વામી, વિષ્ણુસ્વરૂપ દાસ સ્વામી, મોહનદાસજી મહારાજ, જિલ્લા પંચાયત પ્રમુખ ગાયત્રીબા મહિડા, સાંસદ જસુભાઇ રાઠવા, ધારાસભ્ય ડી. કે. સ્વામિ, જિલ્લા પંચાયત ઉપપ્રમુખ અશ્વિનભાઇ પટેલ, અગ્રણી રસિકભાઇ પ્રજાપતિ સહિત મોટી સંખ્યામાં નાગરિકો ઉપસ્થિત રહ્યા હતા.