સુરત: ગુજરાતમાં મેઘ મહેર વચ્ચે અષાઢી વીજળીનો કહેર જોવા મળ્યો છે. આજે રાજ્યના જુદા જુદા વિસ્તારોમાં વીજળી પડવાની ઘટનાઓમાં કુલ ૪ લોકોના કરુણ મોત નીપજ્યા છે, જ્યારે ૨ વ્યક્તિઓ ઇજાગ્રસ્ત થયા હોવાના અહેવાલ મળ્યા છે.
પ્રાથમિક વિગતો મુજબ, સુરત જિલ્લાના કંટવાવ ગામમાં વીજળી પડતા એક ૪૦ વર્ષીય મહિલાનું ઘટનાસ્થળે જ મોત નીપજ્યું હતું, જેના પગલે સ્થાનિક વિસ્તારમાં શોકનું મોજુ ફરી વળ્યું છે.
દાહોદ જિલ્લાના મુવાલિયા ગામમાં વીજળી પડવાની ગંભીર ઘટનામાં પિતા-પુત્ર બંનેના એક સાથે મોત થતા પરિવાર પર આભ તૂટી પડ્યું છે. આ ઘટનાથી ગામમાં ગમગીની છવાઈ ગઈ છે.
જ્યારે દાહોદના જ ધાનપુર વિસ્તારમાં વીજળી પડતા એક ૧૫ વર્ષીય સગીરા ઇજાગ્રસ્ત થઈ હોવાનું સામે આવ્યું છે, જેને તાત્કાલિક સારવાર અર્થે નજીકની હોસ્પિટલમાં ખસેડવામાં આવી છે.
છોટાઉદેપુર જિલ્લાના કોલિયારી ગામમાં પણ વીજળી પડતા એક વ્યક્તિનું મોત થયું છે, જ્યારે અન્ય એક વ્યક્તિ ઇજાગ્રસ્ત થયા હોવાના અહેવાલ છે. ઇજાગ્રસ્તને સારવાર આપવામાં આવી રહી છે.
વરસાદની મોસમમાં વીજળી પડવાની ઘટનાઓ જીવલેણ સાબિત થઈ રહી છે ત્યારે હવામાન વિભાગે લોકોને સાવચેત રહેવા અને વીજળીના કડાકા-ભડાકા સમયે સુરક્ષિત સ્થળે આશ્રય લેવા અપીલ કરી છે.