રાજકોટ, ૨૦ જૂન ૨૦૨૫ : અમદાવાદના મેઘાણીનગર વિસ્તારમાં બનેલી પ્લેન ક્રેશની દુર્ઘટનામાં એક હૃદયદ્રાવક સત્ય સામે આવ્યું છે. ગુમ થયેલા ગુજરાતી ફિલ્મ ડાયરેક્ટર મહેશભાઈ ગીરધરભાઇ કાલાવાડિયા ઉર્ફે 'જીરાવાલા' (ઉ.વ. ૩૪)નું મૃત્યુ આ પ્લેન ક્રેશમાં જ થયું હોવાનું DNA ટેસ્ટ અને તેમની સળગી ગયેલી એક્ટિવાના અવશેષો પરથી ફલિત થયું છે. પરિવારજનોની પ્રબળ શંકાઓ અને મૃત્યુ સ્વીકારવાની અનિચ્છા વચ્ચે પોલીસે દાખવેલી સંવેદનશીલતા અને ઝીણવટભરી તપાસ આ કિસ્સામાં પ્રશંસનીય બની રહી છે.
ગુમ થયેલા ડાયરેક્ટરનું રહસ્યમય કનેક્શન:
પ્લેન ક્રેશના બનાવ બાદ, નરોડા વિસ્તારમાં રહેતા મહેશભાઈ કાલાવાડિયા પોતાની એક્ટિવા લઈને ઘરેથી નીકળ્યા હતા અને શાહીબાગ સિવિલ હોસ્પિટલની આસપાસથી ગુમ થયા હતા. તેમના ભાઈ કાર્તિકભાઈએ નરોડા પોલીસ સ્ટેશનમાં ગુમ થયાની ફરિયાદ નોંધાવી. નરોડા પીઆઈ પી.વી. ગોહિલ અને શાહીબાગ પીઆઇ જે.ડી.ઝાલા સહિતના પોલીસ સ્ટાફે ટેકનિકલ સોર્સના આધારે તપાસ શરૂ કરી. ચોંકાવનારી વાત એ હતી કે, મહેશભાઈનો મોબાઈલ ફોન એર ક્રેશના બનાવ સ્થળની નજીક સ્વીચ ઓફ થયેલો જણાયો. આના પરથી મહેશભાઈ દુર્ઘટનાનો ભોગ બન્યા હોવાની પ્રાથમિક શંકા ગઈ, પરંતુ તેમના પરિવારજનો આ વાત માનવા તૈયાર નહોતા.
DNA ટેસ્ટ: સત્યનો કડવો ઘૂંટ:
અમદાવાદ શહેરના જેસીપી સેક્ટર ૦૨ શ્રી જયપાલસિંહ રાઠોડ અને ડીસીપી ઝોન ૦૬ શ્રી રવિ મોહન સૈની દ્વારા મહેશભાઈના પરિવારજનોને સમજાવવામાં આવ્યા કે DNA ટેસ્ટ કરાવવો જરૂરી છે, જેથી કોઈ શંકા ન રહે. આખરે, મહેશભાઈના ભાઈ કાર્તિક કાલાવાડિયાના DNA નમૂના લેવામાં આવ્યા. પરિવારજનોને સંપૂર્ણ ખાતરી હતી કે મહેશભાઈના ગુમ થવા અને પ્લેન ક્રેશ વચ્ચે કોઈ સંબંધ નથી, પરંતુ ફોરેન્સિક ડિપાર્ટમેન્ટના DNA રિપોર્ટથી સૌ સ્તબ્ધ થઈ ગયા. ઘટના સ્થળેથી મળેલા મૃતદેહ સાથે DNA નમૂના મેચ થતાં, પ્લેન ક્રેશમાં જ મહેશભાઈ કાલાવાડિયાનું મૃત્યુ થયું હોવાનું સ્પષ્ટ થયું.
પરિવારની ના, અને પોલીસની ધીરજ:
આ આઘાતજનક સમાચારથી પરિવારજનો ભાંગી પડ્યા. મહેશભાઈના પત્ની હેતલબેન અને અન્ય સભ્યો કોઈપણ સંજોગોમાં આ વાત માનવા તૈયાર નહોતા. તેમણે પોલીસને જણાવ્યું કે જ્યાં સુધી તેમને પૂરી ખાતરી નહીં થાય ત્યાં સુધી તેઓ મૃતદેહ સ્વીકારશે નહીં.
પોલીસ ટીમે, ખાસ કરીને શાહીબાગ પીઆઇ જે.ડી.ઝાલા અને હેડ કોન્સ્ટેબલ લાલજીભાઈ સહિતના સ્ટાફે, ઝીણવટભરી તપાસ ચાલુ રાખી. મહેશભાઈ તેમની એક્ટિવા પર નીકળ્યા હોવાથી, CCTV ફૂટેજ તપાસવામાં આવ્યા. જેમાં મહેશભાઈ એક્ટિવા પર તે જ સમયે બનાવ સ્થળ પરથી પસાર થતા હોવાનું સામે આવ્યું. તેમ છતાં, પરિવારજનોનું હૃદય પોતાના સ્વજનના મૃત્યુને સ્વીકારવા તૈયાર નહોતું. તેમણે એક્ટિવા મળે અને બધું વેરિફાય થાય પછી જ મૃતદેહ સ્વીકારવાનું જણાવ્યું.
એક્ટિવા મળી, સત્ય સ્વીકારાયું:
અમદાવાદ શહેર પોલીસ ટીમે બનાવ સ્થળે વધુ તપાસ હાથ ધરી. સળગી ગયેલા વાહનો બાબતે મેઘાણીનગર પીએસઆઈ ચાવડા અને સ્ટાફ મારફતે તપાસ કરવામાં આવતા, એક સળગેલી એક્ટિવા મળી આવી. તેના એન્જિન અને ચેસીસ નંબરના આધારે તપાસ કરતા, આ વાહન મૃતક મહેશભાઈ 'જીરાવાલા'નું જ હોવાનું સ્પષ્ટ થયું. આ પુરાવો પરિવારજનોને બતાવતા તેઓ ભાવવિભોર થઈ ગયા અને ધ્રુસકે ધ્રુસકે રડી પડ્યા. તેમણે જણાવ્યું કે, તેમને પ્લેન ક્રેશ થયેલું તે જગ્યાએ મહેશભાઈના જવાની કોઈ શક્યતા ન હોવાથી, તેમને લાગતું હતું કે મૃતદેહ કોઈ અન્યનો છે અને તેમનો દીકરો જીવિત હોવાની શક્યતા હતી, તેથી જ તેમણે ઊંડાણપૂર્વક તપાસ કરાવવાની વિનંતી કરી હતી.
પોલીસની સંવેદનશીલતા અને પ્રશંસા:
બંદોબસ્તમાં રહેલા એસીપી કૃણાલ દેસાઈ, એસીપી રીના રાઠવા, શાહીબાગ પીઆઈ જે.ડી.ઝાલા, નરોડા પીઆઈ પી.વી.ગોહિલ સહિતના સ્ટાફે પરિવારજનોને સાંત્વના આપી, સમજાવ્યા અને ઇશ્વરની ઇચ્છા બળવાન હોવાનું જણાવીને શાંત કર્યા. ત્યારબાદ ગુમ થયેલા મહેશભાઈ કાલાવાડિયા ઉર્ફે મહેશભાઈ જીરાવાલાના પાર્થિવ દેહનો કબજો સોંપવાની કાર્યવાહી કરવામાં આવી.
આ કપરી પરિસ્થિતિમાં અમદાવાદ શહેર પોલીસે પોતાની તમામ રજૂઆત અને શંકા બાબતે ઝીણવટભરી તપાસ કરી, સત્ય બહાર લાવીને 'દૂધનું દૂધ અને પાણીનું પાણી' સાબિત કરનાર અમદાવાદ શહેર પોલીસની સંવેદનશીલ કામગીરીના પરિવારજનોએ ભરપૂર વખાણ કર્યા અને ભાવવિભોર થઈ આભાર વ્યક્ત કર્યો. અમદાવાદ સિવિલ હોસ્પિટલના પીએમ રૂમ ખાતે અત્યંત ભાવવાહી દ્રશ્યો સર્જાયા.
આમ, અમદાવાદ શહેરના પોલીસ કમિશનર શ્રી જ્ઞાનેન્દ્ર સિંહ મલિક, જેસીપી સેક્ટર ૦૨ શ્રી જયપાલ સિંહ રાઠોડ અને ડીસીપી ઝોન ૦૬ શ્રી રવિ મોહન સૈનીના માર્ગદર્શન હેઠળ અમદાવાદ શહેર પોલીસે નરોડા ખાતેથી ગુમ થયેલા યુવાનનું પ્લેન ક્રેશમાં જ મૃત્યુ થયું હોવાનું શોધી કાઢી, 'સેવા સાથે સુરક્ષા'નું ઉત્તરદાયિત્વ નિભાવીને 'પોલીસ પ્રજાનો મિત્ર છે' એ સૂત્રને ફરી એકવાર સાર્થક કર્યું છે.