અમદાવાદ : લૂંટેરી દુલ્હન ગેંગનો કહેવાતો ભાઈ એક શહેરમાં કોઈ એક યુવકને લગ્નની ચુંગાલમાં ફસાવી શિકાર બનાવે, યુવતીની ઓળખાણ પોતાની બહેન તરીકેની આપે અને બાદમાં યુવક ફસાય તો તેની સાથે કહેવાતી બહેનના લગ્ન કરાવે અને લગ્નના એક-બે દિવસમાં બન્ને આરોપીઓ રોકડ અને દાગીના લઈને રફુચક્કર થઈ જાય, જી હા આ પ્રકારની ઠગાઈ આચરનાર લૂંટેરી ગેંગના સાગરીતની પોલીસે ધરપકડ કરી છે. 

કૃષ્ણનગર પોલીસે ભરત વસોયા નામના મૂળ સુરતના રહેવાસી યુવકની ઠગાઈના ગુનામાં ધરપકડ કરવામાં આવી છે. ઘટનાની વિગતવાર વાત કરીયે તો નરોડા વિસ્તારમાં રહેલો પ્રતિક બારોટ નામનો 41 વર્ષીય યુવક બોપલમાં સેલ્સ કો-ઓર્ડીનેટર તરીકે નોકરી કરે છે. તેના પ્રથમ લગ્ન 2013માં થયા હતા, જોકે પત્ની સાથે મનમેળ ન રહેતા વર્ષ 2017માં છુટાછેડા લીધા હતા. 6 મહિના પહેલા પ્રતિકના મામાની દુકાને વારંવાર આવતા ભરત વસોયાએ પોતાની ધર્મની બહેન સ્વાતિ માટે છોકરો હોય તો બતાવવાનું કહેતા પ્રતિકના મામાએ પ્રતિક વિશે વાત કરતા છોકરી જોવાનું નક્કી થયું. પ્રતિકને સ્વાતિ હીવરાલે પસંદ આવતા ભરત વસોયાએ સ્વાતિ ગરીબ હોવાથી 1.60 લાખ આપવાનું કહ્યું હતું. જે બાદ 16 જાન્યુઆરી 2025ના રોજ લગ્ન નક્કી કરાયા હતા.

લગ્નના 4 દિવસ પહેલા ભરત વસોયાએ ફરિયાદી પ્રતિકના મામાને ફોન કરી સ્વાતિના માતા-પિતા અને સંબંધીઓને લેવા માટે મહારાષ્ટ્ર ઓરંગાબાદ જવું પડશે તેમ જણાવી કુલ 24 હજાર રૂપિયા લીધા હતા. લગ્ન પહેલા ભરત વસોયાએ 50 હજાર પણ લગ્નની ખરીદીના નામે મેળવી લીધા હતા. 16મી જાન્યુઆરીના રોજ નરોડામાં પ્રતિકના લગ્ન સ્વાતિ સાથે થયા હતા. જે સમયે તેણે સ્વાતિને સોનાનું મંગળસુત્ર, ચાંદીના દાગીનાં આપ્યા હતા. લગ્ન થતા જ ભરત વસોયાએ બાકીના નીકળતા એક લાખ માંગતા તે પણ રૂપિયા આપી દેવામાં આવ્યા હતા. લગ્નના બીજા દિવસે જ ભરત વસોયાએ પ્રતિકને ફોન કરી લગ્ન થઈ ગયા હોવાથી સ્વાતિનાં પિયરના સગા સંબંધીઓનો જમણવાર કરવો પડશે, જે માટે 50 હજાર રૂપિયા માંગ્યા હતા. જે રૂપિયા સ્વાતિને આપતા સ્વાતિ દાગીના અને રોકડ લઈને ફરાર થઈ ગઈ હતી. જે મામલે પોલીસ ફરિયાદ નોંધાતા અંતે પોલીસે આ આરોપી ભરત વસોયાની ધરપકડ કરી છે.

કૃષ્ણનગર પોલીસે આરોપીની ધરપકડ કરતા સામે આવ્યું કે તે અને સ્વાતિ બન્ને જુના મિત્રો છે અને લાંબા સમયથી આ રીતે અલગ અલગ શહેરમાં જતા હતા. ભરત વસોયા અલગ અલગ પાન પાર્લર અને ચાની કીટલી પર બેસતો અને પોતાની ધર્મની બહેનના લગ્ન માટે વાતો કરતો. જેમાં કોઈ યુવક ફસાઈ જાય તો લગ્ન કરાવી બન્ને આરોપીઓ પૈસા અને દાગીના લઈને બીજા જ દિવસે શહેર છોડીને ફરાર થઈ જતા હતા. આ રીતે આરોપીઓએ સુરતના વરાછા, જામનગર અને રાપરમાં છેતરપિંડી કરી પૈસા પડાવ્યા હોવાની હકિકત સામે આવી છે, તેવામાં પોલીસે હવે લૂંટેરી દુલ્હન સ્વાતિ હિવરાલેની શોધખોળ શરૂ કરી છે. તેનાં પકડાયા બાદ આવા અનેક ભોગ બનનારાઓના ખુલાસા થઈ શકે તેમ છે.