દારૂ-ડ્રગ્સના વેચાણ માટે સ્મગલર્સ અને બુટલેગર્સના નવા ‘જુગાડ'નો પર્દાફાશ
બુટલેગરો અને ડ્રગ પેડલર્સ પોતાનો ગેરકાનૂની વેપાર ચલાવવા માટે કરિયાણાની દુકાનો, શાકભાજીની દુકાનો તથા ઈંડાની લારીઓ જેવી આવશ્યક ચીજવસ્તુઓની દુકાનોનો ઉપયોગ કરી રહ્યા છે
અમદાવાદ, તા.૧૦: ગુજરાતમાં દારૂબંધીના સખ્ત કાયદાઓને લીધે બુટલેગરોને તેમનો ઈલીગલ બિઝનેસ ચલાવવામાં મુશ્કેલીનો સામનો કરવો પડી રહ્યો છે. જોકે, તેમણે તેનો પણ તોડ શોધી લીધો છે અને હાલમાં જ એક ચિંતાજનક ટ્રેન્ડ જોવા મળી રહ્યો છે. ફક્ત અમદાવાદમાં જ પોલીસની શ્રેણીબદ્ધ રેડમાં ખુલાસો થયો છે કે બુટલેગરો અને ડ્રગ પેડલર્સ પોતાનો ગેરકાનૂની વેપાર ચલાવવા માટે કરિયાણાની દુકાનો, શાકભાજીની દુકાનો તથા ઈંડાની લારીઓ જેવી આવશ્યક ચીજવસ્તુઓની દુકાનોનો ઉપયોગ કરી રહ્યા છે.
પોલીસની રેડમાં લાખો રૂપિયાનો પ્રતિબંધિત માલ-સામાન જપ્ત કરવામાં આવ્યો છે અને અનેક લોકોને એરેસ્ટ કરવામાં આવ્યા છે. જોકે, અધિકારીઓએ ર્વોનિંગ આપી છે કે આ તો ફક્ત હિમશિલાની ટોચનો એક ભાગ જ છે, દૈનિક વ્યસાયોને બ્લેક માર્કેટ માટે કવર ઓપેશનમાં ફેરવવામાં આવી રહ્યા છે. શનિવારે અમદાવાદ શહેરમાં બે અલગ અલગ પ્રોહિબિશિન કેસ દ્વારા આ મોડસ ઓપરેન્ડિનો પર્દાફાશ થયો હતો. તેમ ટાઈમ્સ ઓફ ઈન્ડીયા જણાવે છે.
બાતમીના આધારે પોલીસે શનિવારે સવારે ૯.૦૦ વાગ્યાની આસપાસ થલતેજમાં જીવનદીપ સર્કલ નજીક સુવાસ કોમ્પલેક્સમાં એક શાકભાજીની દુકાનમાં રેડ પાડી હતી. પોલીસને એક શખસ મળ્યો હતો જેની પાસે પ્લાસ્ટિકની બેગ હતી જેમાં વ્હિસ્કીની બોટલ હતી. તેણે કથિત રીતે તેને દુકાનમાંથી ખરીદી હોવાનું સ્વીકાર્યું હતું. પોલીસે બે શખસોને એરેસ્ટ કર્યા હતા અને ૮૧,૪૯૦ રૂપિયાની કિંમતની ૧૭૧ બોટલ અને બીયર ટીન જપ્ત કર્યા હતા. જેમાં ફોર સેલ ઈન રાજસ્થાન ઓન્લી લખેલી વોડકા અને વ્હિસ્કીનો પણ સમાવેશ થાય છે. અધિકારીઓએ બે મોબાઈલ ફોન, ૧૬ હજાર રૂપિયા કેશ અને સંભવિત ડિલિવરી માટે ઉપયોગમાં લેવામાં આવતા સ્કૂટરને પણ જપ્ત કર્યું હતું. એક આરોપીએ સ્વીકાર્યું હતું કે, આ દારૂ રાજસ્થાનથી લાવવામાં આવ્યો હતો.
ત્યારબાદ પ્રિવેન્શન ઓફ ક્રાઈમ બ્રાન્ચને ચાંદખેડામાં મણિકળપા સ્કૂલ નજીક એક ખુલ્લા પ્લોટ પર ઈંડાની લારીમાંથી બીયર વેચાતી મળી હતી, અને ત્યાંથી ૧૮૪૦ રૂપિયાની કિંમતના બીયરના આઠ ટીન જપ્ત કરવામાં આવ્યા હતા, તથા એક શખસ સામે પ્રોહિબિશન એક્ટ હેઠળ ગુનો દાખલ કરવામાં આવ્યો હતો.
નાર્કોટિક્સ ડ્રગ્સ એન્ડ સાયકોટ્રોપિક સબસ્ટન્સ એક્ટ હેઠળ એક અલગ કાર્યવાહીમાં સ્ટેટ મોનિટરિંગ સેલ એ ત્રણ અને ચાર જુલાઈના રોજ ઈસનપુરના પાનવાળી સ્ટ્રીટમાં એક કરિયાણાની દુકાન પર રેડ પાડી હતી. આ રેડમાં અધિકારીઓએ ૫૩.૮૩ ગ્રામ મેફેડ્રોન જપ્ત કર્યું હતું, જેની કિંમત ૫.૩૮ લાખ રૂપિયા થાય છે. આ ઉપરાંત ૩૦,૦૦૦ રૂપિયાની કિંમતના બે ફોન અને એક ટુ-વ્હિલરને પણ જપ્ત કરાયા હતા. પોલીસે કુલ મળીને ૫.૭૫ લાખ રૂપિયાનો મુદ્દામાલ જપ્ત કર્યો હતો. જેમાં બે શખસો સામે ગુનો નોંધવામાં આવ્યો છે જ્યારે એક આરોપી ફરાર છે.
પોલીસે જણાવ્યું હતું કે, અગાઉ આ પ્રકારના લોકેશન પર સામાન્ય રીતે કોઈ સર્ચ હા ધરવામાં આવતું ન હતું, જેને લીધે બુટલેગર્સ અને ડ્રગ પેડલર્સ તેનો ગેરલાભ ઉઠાવી રહ્યા છે. જોકે, પોલીસ હવે સખ્ત બની છે અને તેને લીધે આ મોડસ ઓપરેન્ડી ખુલ્લી પડી છે. પોલીસે મેડિકલ સ્ટોર્સમાંથી કોડીન બેઝ્ડ કફ સિરપના વેચાણ અંગે પણ ચિંતા વ્યક્ત કરી છે. અધિકારીએ જણાવ્યું હતું કે, તાજેતરમાં જ ઓઢવના એક રાજકીય નેતાને કોડીન બેઝ્ડ સિરપ વેચવા બદલ બાપુનગર પોલીસે થોડા સમય માટે અટકાયતમાં લીધા હતા, પરંતુ બાદમાં તેમને છોડી દેવામાં આવ્યા હતા. (રર.૨૩)
(4:10 PM IST)
છેલ્લા 8 દિવસમાં સૌથી લોકપ્રિય 
