ભરૂચઃ  ભરૂચ જિલ્લાના ઝઘડીયા જી.આઈ.ડી.સી. વિસ્તારમાં ત્રણ દિવસ પહેલાં બનેલી ટ્રક અકસ્માતની ઘટના હવે હત્યાકાંડમાં ફેરવાઈ છે. ભરૂચ પોલીસની દ્રઢ કામગીરીથી ખુલ્યું છે કે, આ ઘટના અકસ્માત નહીં પરંતુ પૂર્વ આયોજિત હત્યા હતી. પોલીસે ત્રણ આરોપીઓને ઝડપી પાડ્યા છે, જ્યારે મુખ્ય સૂત્રધાર સરપંચ પતિ રતિલાલ વસાવાને વોન્ટેડ જાહેર કર્યો છે.
ગત 13 ઓગસ્ટના રોજ શીયાલી-બાંડાબેડા ત્રણ રસ્તા નજીક ટ્રકે બાઈકસવાર ભોગીલાલ વસાવાને ટક્કર મારી હતી. આ અકસ્માતમાં ભોગીલાલનું સ્થળ પર જ મોત થયું હતું. શરૂઆતમાં બેદરકારીથી થયેલો અકસ્માત માનવામાં આવ્યો હતો. જો કે તપાસ દરમિયાન શંકાસ્પદ પાસાં સામે આવતા પોલીસે ગંભીરતાપૂર્વક તપાસ હાથ ધરી હતી.