સુરત : ગુજરાતના ગૃહ રાજ્યમંત્રી હર્ષ સંઘવીએ સુરતમાં પત્રકાર પરિષદ યોજીને દિવાળીના તહેવાર દરમિયાન રાજ્યની એસટી બસ સેવાઓમાં વધારો કરવાની જાહેરાત કરી છે. તેમણે જણાવ્યું કે, સુરત શહેર લાખો લોકોને રોજગારી આપે છે અને પરિવારોના સપના સાકાર કરવામાં મહત્વનું યોગદાન આપે છે. આ શહેર અને રાજ્યને દેશના સર્વોચ્ચ સ્થાને લઈ જવાનો શ્રેય અહીંના લોકોને જાય છે. દિવાળીના તહેવાર દરમિયાન હજારો પરિવારો પોતાના વતન, જેમ કે સૌરાષ્ટ્ર, બનાસકાંઠા, પાટણ, અને સાબરકાંઠા જેવા વિસ્તારોમાં જતા હોય છે, જેના માટે રાજ્ય સરકારે વિશેષ વ્યવસ્થા કરી છે.   

ગૃહ રાજ્યમંત્રી હર્ષ સંઘવીએ જણાવ્યું કે, “સુરતની ધરતી લાખો લોકોને રોજગારી આપે છે અને અહીંના લોકો રાજ્યને દેશના સર્વોચ્ચ સ્થાને લઈ જવામાં યોગદાન આપે છે. દિવાળીના તહેવારમાં લોકો પોતાના વતન જાય તે માટે રાજ્ય સરકારે આ વખતે 1,600 એક્સ્ટ્રા બસોનું આયોજન કર્યું છે. અમે ખાતરી કરીશું કે દરેક મુસાફરને સરળ અને સુરક્ષિત પરિવહન મળે.”

ગુજરાતમાં દર વર્ષે દિવાળી દરમિયાન GSRTC દ્વારા એક્સ્ટ્રા બસોનું આયોજન કરવામાં આવે છે. ગત વર્ષે ઓક્ટોબર 2024માં દિવાળી અને નવા વર્ષના તહેવારો દરમિયાન 1,200 એક્સ્ટ્રા બસો દોડાવવામાં આવી હતી, જેનો લાભ લગભગ 20 લાખ મુસાફરોએ લીધો હતો. આ વર્ષે માંગમાં વધારો થતાં 1,600 બસોનું આયોજન કરવામાં આવ્યું છે, જેમાં વડોદરા રૂટ પર ખાસ ધ્યાન આપવામાં આવ્યું છે.

નિયમિત સેવા : ગુજરાત રાજ્ય માર્ગ પરિવહન નિગમ (GSRTC) દ્વારા દરરોજ 8,000 બસો દોડાવવામાં આવે છે, જેનો લાભ 27,000 લોકો લઈ રહ્યા છે.

એક્સ્ટ્રા બસો : આ વર્ષે ધારાસભ્યો અને અન્ય પ્રતિનિધિઓની માંગને ધ્યાનમાં રાખીને, દિવાળી દરમિયાન 16 ઓક્ટોબરથી 19 ઓક્ટોબર સુધી 1,600 વધારાની બસોનું આયોજન કરવામાં આવ્યું છે.

રૂટનું આયોજન : આ બસો રાજ્યના વિવિધ વિસ્તારોમાં ખાસ કરીને સૌરાષ્ટ્ર, બનાસકાંઠા, પાટણ, સાબરકાંઠા અને વડોદરા રૂટ પર સંચાલિત કરવામાં આવશે.

બુકિંગ વ્યવસ્થા : ઓનલાઈન અને ઓફલાઈન બુકિંગની સુવિધા ઉપલબ્ધ કરવામાં આવી છે. આ ઉપરાંત, સોસાયટી અને ગ્રૂપ બુકિંગની વ્યવસ્થા પણ કરવામાં આવી છે.

ગામડાં સુધી પહોંચ : ખાસ વ્યવસ્થા હેઠળ, બસો ગામના ઝાંપા સુધી મુસાફરોને મૂકશે, જેથી ગ્રામીણ વિસ્તારમાંથી આવતા પ્રવાસીઓને સરળતા રહે.

ભાજપની માંગ : શહેરના ભારતીય જનતા પાર્ટી (BJP)ના પ્રતિનિધિઓએ વધુ બસોની માંગ કરી હતી, જેને ધ્યાનમાં રાખીને વધારાની બસોની વ્યવસ્થા કરવામાં આવશે.

ઉલ્લેખનિય છે કે, દર વર્ષે દિવાળી ઉપર સુરતથી વતન જવા માટે રેલવે સ્ટેશન ઉપર મોટા પ્રમાણમાં ભીડ લાગે છે. તો બસ સ્ટેશનોમાં પણ કિડિયારાની જેમ વસ્તી ઉભરાય છે, પરંતુ તેથી ટ્રાન્સપોર્ટેશનની વ્યવસ્થા ખોરવાઈ પડે છે. લોકો પોતાના વતનમાં સમયસર પહોંચી શકતા નથી, તો ઘરે પહોંચવામાં સુરક્ષિત ટ્રાન્સપોર્ટ પણ મળતું નથી. અંતે તો લોકોને વધારે પૈસા ખર્ચીને ગમે તેવી ગાડીઓમાં હેરાન-પરેશાન થઈને જવું પડતું હોય છે. તો દિવાળી ઉપર લક્ઝરી જેવી ટ્રાન્સપોર્ટ ડબલથી પણ વધારે ભાડૂં વસૂલતા હોય છે, તેથી ખુબ જ મુશ્કેલીઓ ઉભી થતી હોય છે.

આ તમામ સમસ્યાઓને ઉકેલવા માટે હર્ષ સંઘવીએ પહેલાથી જ વાહન વ્યવહારની સેવાઓ ઉપર ધ્યાન આપ્યું છે. જેથી લોકો સરળ અને સુરક્ષિત રીતે યોગ્ય ભાડૂં ચૂકવીને પોતાના માદરે વતન જઈ શકે.