અમદાવાદ :ભારતીય હવામાન વિભાગ (IMD) દ્વારા જાહેર કરાયેલી માહિતી અનુસાર, અરબી સમુદ્રમાં હવામાન પલટાના સંકેતો જોવા મળી રહ્યા છે. ગતરોજ ગલ્ફ ઓફ ખંભાત પર છવાયેલું 'વેલ માર્ક્ડ લો પ્રેશર' હવે કચ્છના અખાત અને તેની આસપાસના વિસ્તારો પર કેન્દ્રિત થયું છે. આજે, 30 સપ્ટેમ્બર 2025 ના રોજ, આ સિસ્ટમ કચ્છના અખાત પર સ્થિત હતી. તેની સાથે સંકળાયેલ ચક્રવાત પરિભ્રમણ સરેરાશ સમુદ્ર સપાટીથી 7.6 કિલોમીટર સુધી વિસ્તરેલું છે અને ઊંચાઈ સાથે દક્ષિણ-પશ્ચિમ તરફ નમેલું છે. ઉત્તરપૂર્વ અરબી સમુદ્રમાં પ્રવેશ કરતી વખતે આ લૉ પ્રેશર ડિપ્રેશનમાં વધુ તીવ્ર બની શકે છે.

આ લો પ્રેશર સિસ્ટમ આગામી 12 કલાક દરમિયાન કચ્છ અને તેની આસપાસના વિસ્તારોમાંથી ઉત્તર-પશ્ચિમ તરફ આગળ વધે તેવી શક્યતા છે, ત્યારબાદ તે ઉત્તર ગુજરાતના દરિયાકાંઠેથી ઈશાન અરબી સમુદ્રમાં પ્રવેશી શકે છે. ઈશાન અરબી સમુદ્રમાં પ્રવેશ કર્યા પછી, તેના ડિપ્રેશનમાં ફેરવાઈને વધુ તીવ્ર બનવાની સંભાવના છે અને ત્યારબાદ તે વાયવ્ય અરબી સમુદ્ર તરફ પશ્ચિમ-દક્ષિણ-પશ્ચિમ દિશામાં આગળ વધશે.

હવામાન વિભાગના અંદાજ મુજબ, આ સિસ્ટમનું કેન્દ્ર 22.7 ઉત્તર અક્ષાંશ અને 69.5 પૂર્વ રેખાંશ પર છે, જેમાં અંદાજિત કેન્દ્રીય દબાણ 998 hPa (હેક્ટોપાસ્કલ) નોંધાયું છે. તેની સાથે સંકળાયેલી મહત્તમ સતત પવન ગતિ અંદાજે 28-37 કિમી/કલાક છે, જે અંદાજે 55 કિમી/કલાક સુધી પહોંચી શકે છે.

ઉત્તર અને તેની નજીકના મધ્ય અરબી સમુદ્ર તથા સૌરાષ્ટ્રને અડીને આવેલા કચ્છના અખાત પર છૂટાછવાયાથી તૂટેલા નીચા અને મધ્યમ વાદળો જોવા મળ્યા હતા, જેમાં તીવ્રથી અતિ તીવ્ર સંવહન હતું અને વાદળોના ટોચનું ન્યૂનતમ તાપમાન 70-90°C હતું. મધ્ય અરબી સમુદ્ર પર મધ્યમથી તીવ્ર સંવહન પણ જોવા મળ્યું હતું. આ સિસ્ટમ પર ભુજ સ્થિત ડોપ્લર વેધર રડાર દ્વારા પણ સતત નજર રાખવામાં આવી રહી છે. સવારે 0300 UTC ના પવન વિશ્લેષણ દર્શાવે છે કે કચ્છ પ્રદેશ પર પવન પાછળની તરફ વળી રહ્યા છે, જે ઠંડા પવનનું આગમન સૂચવે છે

30 સપ્ટેમ્બરથી 3 ઓક્ટોબર દરમિયાન, ઉત્તરપૂર્વ અરબી સમુદ્ર, ઉત્તર ગુજરાતના દરિયાકાંઠા અને કચ્છના અખાતમાં 40-50 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે, જે 60 કિલોમીટર પ્રતિ કલાક સુધી પહોંચવાની શક્યતા છે. ત્યારબાદ પવનની ગતિ ધીમે ધીમે ઘટશે. 2 થી 3 ઓક્ટોબર દરમિયાન, ઉત્તરપૂર્વ અને તેને અડીને આવેલા ઉત્તરપશ્ચિમ અરબી સમુદ્રમાં 50-60 કિલોમીટર પ્રતિ કલાકની ઝડપે તોફાની પવન ફૂંકાઈ શકે છે, જે 70 કિલોમીટર પ્રતિ કલાક સુધી પહોંચી શકે છે. 4 થી 5 ઓક્ટોબર દરમિયાન, ઉત્તરપશ્ચિમ અને તેને અડીને આવેલા ઉત્તરપૂર્વ અરબી સમુદ્રમાં પણ સમાન ગતિના પવનોની સંભાવના છે.

30 સપ્ટેમ્બરથી 3 ઓક્ટોબર સુધી, ઉત્તરપૂર્વ અરબી સમુદ્ર, ઉત્તર ગુજરાતના દરિયાકાંઠા અને કચ્છના અખાતમાં દરિયાઈ સ્થિતિ ખરાબથી ખૂબ જ ખરાબ રહેવાની સંભાવના છે. ત્યારબાદ તેમાં ધીમે ધીમે સુધારો જોવા મળશે. 2 થી 3 ઓક્ટોબર દરમિયાન, ઉત્તરપૂર્વ અને તેને અડીને આવેલા ઉત્તરપશ્ચિમ અરબી સમુદ્ર તેમજ ઉત્તર ગુજરાતના દરિયાકાંઠા અને કચ્છના અખાતમાં દરિયાઈ સ્થિતિ અત્યંત ખરાબ રહેશે. 4 થી 5 ઓક્ટોબર દરમિયાન, ઉત્તરપશ્ચિમ અને તેને અડીને આવેલા ઉત્તરપૂર્વ અરબી સમુદ્રમાં પણ દરિયાઈ સ્થિતિ અત્યંત ખરાબ રહેવાની શક્યતા છે

માછીમારોને 30 સપ્ટેમ્બરથી 3 ઓક્ટોબર દરમિયાન ઉત્તરપૂર્વ અરબી સમુદ્ર, ઉત્તર ગુજરાતના દરિયાકાંઠા અને કચ્છના અખાતમાં ન જવાની સલાહ આપવામાં આવે છે. 2 થી 3 ઓક્ટોબર દરમિયાન ઉત્તરપૂર્વ અને તેને અડીને આવેલા ઉત્તરપશ્ચિમ અરબી સમુદ્રમાં પણ માછીમારી માટે ન જવું. 4 થી 5 ઓક્ટોબર દરમિયાન ઉત્તરપશ્ચિમ અને તેને અડીને આવેલા ઉત્તરપૂર્વ અરબી સમુદ્રમાં પણ માછીમારોને દરિયો ન ખેડવા સૂચના આપવામાં આવી છે.

સૌરાષ્ટ્ર અને કચ્છના વિસ્તારોમાં ૩૦મી સપ્ટેમ્બરથી ૨જી ઓક્ટોબર દરમિયાન અનેક સ્થળોએ હળવાથી મધ્યમ વરસાદની શક્યતા છે, જ્યારે છૂટાછવાયા સ્થળોએ ભારે વરસાદ પણ વરસી શકે છે.