અમદાવાદ, તા. ૨૩ ઓક્ટોબર : અમદાવાદમાં ભારતીય અવકાશ સંશોધન સંસ્થા (ઇસરો)ના કેમ્પસમાં આજે એક મોટી આગની દુર્ઘટના બનતા ભારે ખળભળાટ મચી ગયો હતો. કેમ્પસમાં આવેલા આઇટી સર્વર બિલ્ડિંગના ઉપલા માળે આગ ફાટી નીકળી હતી. સદભાગ્યે, આ ઘટનામાં કોઈ જાનહાનિના સમાચાર નથી, પરંતુ આગના કારણે આઇટી ઇન્ફ્રાસ્ટ્રક્ચર અને કિંમતી ઉપકરણોને મોટું નુકસાન થયું છે. જે સર્વરોમાં આગ લાગી, તેમાં અત્યંત મહત્વપૂર્ણ ડેટા હોવાનું કહેવાય છે, જે બળીને ખાક થઈ ગયા હોવાની પ્રબળ આશંકા સેવાઇ રહી છે.
પ્રાપ્ત વિગતો અનુસાર, આ આગ ઇસરો પરિસરના એક્ઝિટ ગેટ (બહાર નીકળવાના દરવાજા) પાસે આવેલા બિલ્ડિંગમાં લાગી હતી. ઘટનાની ગંભીરતાને જોતાં અમદાવાદ શહેરના ફાયર વિભાગે તાત્કાલિક કાર્યવાહી હાથ ધરી હતી અને ફાયર બ્રિગેડના ચાર ફાયર ટેન્ડરો (બંબા) ઘટનાસ્થળે દોડી ગયા હતા.
ફાયર ફાઇટર્સે ત્વરિત કામગીરી કરીને આગને કાબૂમાં લેવાની કાર્યવાહી શરૂ કરી દીધી હતી અને ટૂંકા ગાળામાં જ પરિસ્થિતિ પર નિયંત્રણ મેળવી લીધું હતું. સાવચેતીના ભાગરૂપે, જે બિલ્ડિંગમાં આગ લાગી હતી ત્યાં કામ કરી રહેલા તમામ કર્મચારીઓને સુરક્ષિત રીતે બહાર કાઢી લેવામાં આવ્યા હતા.
અધિકારીઓના જણાવ્યા મુજબ, આગના કારણે આઇટી વિભાગના ઇન્ફ્રાસ્ટ્રક્ચરને મોટું નુકસાન થયું છે, જેમાં અનેક કમ્પ્યુટરો અને અન્ય કિંમતી ઉપકરણો બળીને નાશ પામ્યા છે. હાલમાં નુકસાનના ચોક્કસ પ્રમાણનું આકલન કરવાની કામગીરી ચાલી રહી છે.
આગ લાગવાનું સંભવિત કારણ ઇલેક્ટ્રિકલ શોર્ટ સર્કિટ હોવાનું પ્રાથમિક તપાસમાં માનવામાં આવી રહ્યું છે. તેમ છતાં, આગ લાગવાનું ચોક્કસ કારણ જાણવા માટે સંસ્થા દ્વારા આંતરિક તપાસ શરૂ કરવામાં આવી છે.
ઉલ્લેખનીય છે કે, વર્ષ ૨૦૧૮માં પણ અમદાવાદમાં ઇસરોના સ્પેસ એપ્લિકેશન્સ સેન્ટર (SAC) ખાતે આવી જ એક આગ લાગવાની ઘટના બની હતી. તે સમયે પણ શોર્ટ સર્કિટના કારણે આગ લાગી હોવાની શંકા વ્યક્ત કરવામાં આવી હતી અને એન્ટેના ટેસ્ટ સુવિધામાં આગ લાગવાથી કેટલાક ખાસ ઉપકરણોને નુકસાન થયું હતું.