વડોદરા: વડોદરા જિલ્લાના કરજણ નજીક નેશનલ હાઇવે ૪૮ પર આજે માર્ગ અકસ્માતોની હારમાળા સર્જાઈ હતી, જેમાં બે અલગ-અલગ ઘટનાઓમાં એક મહિલા સહિત બે લોકોએ જીવ ગુમાવ્યો હતો. વરસાદી માહોલ અને ઓછી વિઝિબિલિટી (દ્રશ્યતા) ને કારણે કરજણ નજીક એક સાથે પાંચ વાહનો એકબીજા સાથે અથડાયા હતા.
પ્રથમ વિચિત્ર અકસ્માત કરજણ નજીક નેશનલ હાઇવે ૪૮ પર સર્જાયો હતો, જ્યાં ટ્રક ચાલકે એક બાઇકને અડફેટે લીધું હતું. આના કારણે પાછળ આવતા અન્ય ચાર વાહનો એક પછી એક ટ્રક સાથે અથડાયા હતા, જેના પગલે હાઇવે પર ભારે ટ્રાફિક જામ સર્જાયો હતો. આ ઘટનામાં ઇજાગ્રસ્ત બાઇક સવારને ૧૦૮ એમ્બ્યુલન્સ મારફતે સારવાર અર્થે પાલેજ લઈ જવામાં આવ્યો હતો. આ ભયાનક અકસ્માતનું મુખ્ય કારણ વરસાદી માહોલમાં ઓછી વિઝિબિલિટી હોવાનું માનવામાં આવે છે.
બીજા એક ગંભીર અકસ્માતમાં, કરજણ નેશનલ હાઇવે પર આવેલા બામણગામની સીમમાં ટ્રક ચાલકે બેદરકારીપૂર્વક ટ્રક હંકારીને એક બાઇક ચાલકને અડફેટે લીધો હતો. આ દુર્ઘટનામાં કરજણ તાલુકાના લતીપુર ટીંબી ગામની ચંપાબેન રાજુભાઈ વસાવા (ઉ.વ. ૩૫) નું કરૂણ મોત નીપજ્યું હતું. કરજણ પોલીસે આ મામલે ટ્રક ચાલક વિરુદ્ધ ફરિયાદ નોંધીને કાયદેસરની કાર્યવાહી હાથ ધરી છે.

આ ઉપરાંત, વડોદરા તાલુકા પોલીસ મથકની હદમાં સમિયાલા સેલ પેટ્રોલ પંપની આગળ અજાણ્યા વાહનચાલકે આશરે ૩૦ થી ૩૫ વર્ષના એક અજાણ્યા પુરુષને અડફેટે લેતા તેમનું પણ કરૂણ મોત નીપજ્યું હતું. તાલુકા પોલીસે હાલમાં મૃતકની ઓળખ અને તેના વાલી-વારસની શોધખોળ હાથ ધરી છે.