ગાંધીનગર/દ્વારકા: માનનીય પ્રધાનમંત્રી શ્રી નરેન્દ્ર મોદીજીની અધ્યક્ષતામાં આર્થિક બાબતોની કેબિનેટ કમિટી (CCEA) એ ગુજરાતના વિકાસને વેગ આપતો એક અત્યંત મહત્ત્વપૂર્ણ નિર્ણય લીધો છે. કેન્દ્ર સરકારે ઓખા–કાનાલુસ રેલ વિભાગના ડબલ લાઇન પ્રોજેક્ટને સત્તાવાર મંજૂરી આપી દીધી છે, જે પીએમ-ગતિ શક્તિ નેશનલ માસ્ટર પ્લાનનો એક ભાગ છે. આ પ્રોજેક્ટનો મુખ્ય ઉદ્દેશ્ય દેવભૂમિ દ્વારકા જેવા મુખ્ય તીર્થસ્થળની કનેક્ટિવિટી વધારવા ઉપરાંત સૌરાષ્ટ્ર ક્ષેત્રમાં લોજિસ્ટિક્સની કાર્યક્ષમતા અને મલ્ટી-મોડલ કનેક્ટિવિટીને મજબૂત બનાવવાનો છે. ₹1,457 કરોડના ખર્ચે સાકાર થનારો આ 159 કિલોમીટર લાંબો ડબલિંગ પ્રોજેક્ટ દ્વારકા આવતા લાખો યાત્રાળુઓ માટે ઝડપી, સુરક્ષિત અને અવિરત મુસાફરીનો માર્ગ ખોલશે.
આ પ્રોજેક્ટ ધાર્મિક અને આર્થિક બંને દ્રષ્ટિકોણથી ગુજરાત માટે ગેમ-ચેન્જર સાબિત થશે. દ્વારકા વિશ્વના મુખ્ય તીર્થસ્થાનોમાંનું એક હોવાથી, ડબલ લાઇન બનવાથી તહેવારો અને ધાર્મિક પ્રસંગો દરમિયાન ટ્રેનોની અવરજવર સરળ બનશે. સાથે જ, આ રેલ સેક્શન ઓખા પોર્ટ અને સલાયા પોર્ટ જેવા મહત્ત્વના આર્થિક કેન્દ્રોને મજબૂત રેલ કનેક્ટિવિટી પૂરી પાડશે. આના પરિણામે, ખાદ્ય મીઠા સહિત અન્ય વસ્તુઓના માલ પરિવહનમાં નોંધપાત્ર વધારો થશે અને આશરે 11 મિલિયન ટન જેટલી વધારાની માલ પરિવહન ક્ષમતા વિકસિત થશે, જે સૌરાષ્ટ્રના ઔદ્યોગિક વિકાસને સીધો વેગ આપશે.
સૌથી મહત્ત્વની વાત એ છે કે આ ડબલિંગ પ્રોજેક્ટ માત્ર લોજિસ્ટિક્સ કાર્યક્ષમતા જ નહીં, પરંતુ પર્યાવરણ સંરક્ષણમાં પણ મોટો હિસ્સો આપશે. ડબલ લાઇનના કારણે ટ્રેનોની ગતિ વધશે અને ઇંધણનો વપરાશ ઘટશે, જેનાથી દર વર્ષે આશરે 14 કરોડ કિલોગ્રામ CO₂ ઉત્સર્જનમાં ઘટાડો થશે—જે લગભગ 56 લાખ વૃક્ષો વાવવાની સમકક્ષ છે. આ ઉપરાંત, દર વર્ષે 2.8 કરોડ લીટર ડીઝલની બચત થશે અને દેશને આશરે ₹311 કરોડનો લોજિસ્ટિક્સ ખર્ચનો ઘટાડો પ્રાપ્ત થશે. આર્થિક વિકાસની સાથે પર્યાવરણને પણ પ્રાથમિકતા આપતો આ નિર્ણય ખરેખર પ્રશંસનીય છે.
નવા ઓખા-કાનાલુસ પ્રોજેક્ટમાં 7 મુખ્ય અને 143 નાના પુલોનું નિર્માણ થશે, જેમાં ઓખા, મીઠાપુર, દ્વારકા, ખંભાળિયા અને કાનાલુસ સહિત કુલ 12 સ્ટેશનો આવરી લેવાશે. ઉલ્લેખનીય છે કે, રાજકોટ–કાનાલુસ વિભાગ (111 કિમી) પર ડબલિંગનું કાર્ય ₹1,080 કરોડના ખર્ચે ઝડપથી ચાલી રહ્યું છે અને તે જૂન 2026 સુધીમાં પૂર્ણ થવાની અપેક્ષા છે. ઓખા-કાનાલુસ ડબલિંગની મંજૂરી સાથે, હવે સમગ્ર સૌરાષ્ટ્ર પ્રદેશમાં કનેક્ટિવિટીનો એક નવો યુગ શરૂ થશે, જે પ્રવાસન, ઉદ્યોગ અને માલ પરિવહનને અભૂતપૂર્વ ગતિ પ્રદાન કરશે.