અમદાવાદઃ નર્મદા જિલ્લામાં કાયદો અને વ્‍યવસ્‍થાની સ્‍થિતિ કથળી હોય તેમ આમ આદમી પાર્ટી ના જિલ્લા પ્રમુખ નિરંજન વસાવા પર ફરી એકવાર જીવલેણ હુમલો થયો છે. નાંદોદ તાલુકાના મયાસી ગામમાં સભા પતાવી પરત ફરી રહેલા નિરંજન વસાવા અને તેમના કાર્યકર્તાઓ પર ૧૫થી ૨૦ લોકોના ટોળાએ હુમલો કરતા સમગ્ર પંથકમાં ભયનો માહોલ ફેલાયો છે.

માહિતી અનુસાર, નિરંજન વસાવા મયાસી ગામે જનસભા સંબોધીને કાર્યકર્તાઓ સાથે પરત ફરી રહ્યા હતા, ત્‍યારે અગાઉથી ટાંપીને બેઠેલા ટોળાએ તેમની ગાડીને ઘેરી લીધી હતી. ૧૫થી ૨૦ જણાની આ ટોળકીએ લાકડીઓ અને પથ્‍થરો વડે હુમલો કરતા ગાડીને ભારે નુકસાન થયું છે.

ઘટના બાદ નિરંજન વસાવા જ્‍યારે ફરિયાદ નોંધાવવા આમલેથા પોલીસ સ્‍ટેશન પહોંચ્‍યા, ત્‍યારે પોલીસની નિષ્‍ક્રિયતા સામે આવી હતી. તેમણે આરોપ લગાવ્‍યો કે, પોલીસે એક કલાક સુધી ફરિયાદ નોંધી ન હતી.

આપ નેતા નિરંજન વસાવાએ દાવો કર્યો છે કે બૂટલેગરો દ્વારા તેમના પર આ ચોથી વખત હુમલો કરવામાં આવ્‍યો છે.(૬.૧૪)