અંબાજી / પાલનપુર:યાત્રાધામ અંબાજી નજીક આવેલા દાંતા તાલુકાના પાડલીયા ગામમાં વન વિભાગની જમીન પર ચાલી રહેલા વર્ષો જૂના વિવાદે હિંસક વળાંક લીધો છે, જેના પગલે ગઈકાલે થયેલા હુમલાનો એક ચોંકાવનારો વીડિયો સામે આવ્યો છે. આ વીડિયોમાં સ્પષ્ટપણે જોઈ શકાય છે કે, સ્થાનિકોના આક્રમક ટોળાએ પોલીસ અને ફોરેસ્ટ વિભાગના વાહનોને નિશાન બનાવીને આગચંપી કરી હતી, જેના કારણે સરકારી સંપત્તિને ભારે નુકસાન પહોંચ્યું છે. સરકારી વાહનોમાં આગની જ્વાળાઓ ઊંચે ઉઠતી હોવાના આ દૃશ્યોએ વિસ્તારમાં સર્જાયેલા તણાવપૂર્ણ માહોલની ગંભીરતાને ઉજાગર કરી છે.

આ હિંસક ઘટનાની સૌથી મોટી અપડેટ એ છે કે, બનાસકાંઠા પોલીસ દ્વારા હવે હુમલો કરનારા આશરે 500 લોકોના ટોળા સામે ફરિયાદ નોંધવામાં આવી છે. દાંતા રેન્જના DySP કુણાલ સિંહ પરમારે જણાવ્યું છે કે, પોલીસ FSL (ફોરેન્સિક સાયન્સ લેબોરેટરી)ની ટીમને સાથે રાખીને ઘટનાસ્થળનું પંચનામું કરશે. DySPએ ખાતરી આપી છે કે કાયદા અને વ્યવસ્થાનું ઉલ્લંઘન કરનારા જવાબદારો સામે કડકમાં કડક કાર્યવાહી કરવામાં આવશે. આ હુમલામાં ગોફણ અને તીર-કામઠા જેવા પરંપરાગત હથિયારો સાથે પથ્થરમારો થયો હતો, જેમાં પોલીસ, વન વિભાગ અને રેવન્યુ વિભાગના કુલ 47 અધિકારી અને કર્મચારીઓ ઘાયલ થયા છે.

આ હિંસા પાછળનું મૂળ કારણ પાડલીયા ગામની સર્વે નંબર 9માં આવેલી વન વિભાગની જમીન પર નર્સરી અને પ્લાન્ટેશનની કામગીરી હતી, જેના પર સ્થાનિક લોકો પોતાનો હક માની રહ્યા હતા. લાંબા સમયના અસંતોષને કારણે જ્યારે સંયુક્ત સરકારી ટીમ કાર્યવાહી માટે પહોંચી ત્યારે આ હિંસા ભડકી હતી. પરિસ્થિતિ એટલી ગંભીર બની ગઈ કે પોલીસે ટોળાને વિખેરવા માટે ટીયર ગેસના સેલ છોડ્યા, પરંતુ તેનાથી ટોળું વધુ ઉશ્કેરાયું અને આક્રમક બનતાં સરકારી વાહનોને આગ ચાંપી દેવામાં આવી. ગંભીર રીતે ઘાયલ થયેલા અંબાજી પોલીસ ઇન્સ્પેક્ટર આર.બી. ગોહિલ સહિત તમામ ઇજાગ્રસ્તોને પાલનપુર સિવિલ હોસ્પિટલમાં સારવાર આપવામાં આવી રહી છે.

ઘટનાની ગંભીરતા જોતાં બનાસકાંઠા જિલ્લા કલેક્ટર મિહિર પટેલ, વન વિભાગના વરિષ્ઠ અધિકારીઓ અને સ્થાનિક ધારાસભ્ય અનિકેત ઠાકર પાલનપુર હોસ્પિટલ પહોંચ્યા હતા અને ઘાયલોની મુલાકાત લીધી હતી. કલેક્ટર મિહિર પટેલે આ હુમલો પૂર્વ આયોજન સાથે કરવામાં આવ્યો હોવાની સંભાવના વ્યક્ત કરી છે. સરકારે પણ આ હુમલાને 'નિંદનીય' ગણાવીને ફરજ પરના અધિકારીઓ પ્રત્યે સંયમ અને કર્તવ્યનિષ્ઠા બદલ પ્રશંસા કરી છે અને ખાતરી આપી છે કે દોષિતોને છોડવામાં નહીં આવે. હાલમાં જિલ્લાની પોલીસને પણ પરિસ્થિતિ કાબૂમાં લેવા માટે બોલાવવામાં આવી છે, અને સમગ્ર વિસ્તારમાં તણાવપૂર્ણ શાંતિ પ્રવર્તી રહી છે.