બારડોલી, તા. ૧૫ ડિસેમ્બર, ૨૦૨૫ : સુરત જિલ્લાના બારડોલી ખાતે ધુલીયા ચોકડી પાસે આવેલા ભંગાર અને પ્લાસ્ટિકના ૧૦ થી વધુ ગોડાઉનોમાં આજે મોડી રાત્રે અંદાજે ૨ થી ૨:૩૦ વાગ્યાની વચ્ચે ભીષણ આગ લાગવાની ગંભીર ઘટના બની હતી. પ્લાસ્ટિકનો મોટો જથ્થો હોવાને કારણે આગે જોતજોતામાં વિકરાળ સ્વરૂપ ધારણ કરી લીધું હતું અને તમામ ૧૦ થી વધુ ગોડાઉનો સંપૂર્ણપણે બળીને ખાખ થઈ ગયા હતા.
મેજર કૉલ જાહેર:
આગની ગંભીરતાને જોતાં પ્રાંત અધિકારી દ્વારા આ ઘટનાને સુરત જિલ્લાના મેજર કૉલ તરીકે જાહેર કરવામાં આવ્યો હતો. સુરત જિલ્લા ફાયર ઓફિસર પી. બી. ગઢવીએ જણાવ્યું હતું કે, આગ એટલી વિકરાળ હતી કે ધૂમાડાના મોટા ગોટેગોટા બે કિલોમીટર દૂરથી પણ સ્પષ્ટપણે જોઈ શકાતા હતા, જેના કારણે ઘટનાસ્થળે ભારે અફરાતફરી મચી ગઈ હતી.
૧૫ થી વધુ ફાયર ગાડીઓ સ્થળ પર:
આગ પર કાબૂ મેળવવા માટે તાત્કાલિક ફાયર વિભાગની ૧૫ થી વધુ ગાડીઓ સ્થળ પર પહોંચી ગઈ હતી. બારડોલી, કામરેજ, વ્યારા, પી.ઈ.પી.એલ. (PEPL) અને હોજીવાલા સહિત વિવિધ સ્થળોની ફાયર ટીમોએ સંયુક્ત ઓપરેશન હાથ ધરી સતત પાણીનો મારો ચલાવ્યો હતો. પ્લાસ્ટિકના વિશાળ જથ્થાને કારણે આગને કાબૂમાં લેવામાં ભારે મુશ્કેલી પડી હતી, પરંતુ ફાયર બ્રિગેડની ટીમને ભારે જહેમત બાદ આગ પર સંપૂર્ણપણે કાબૂ મેળવવામાં સફળતા મળી હતી.
આ આગને કારણે ગોડાઉનોમાં રહેલો તમામ માલસામાન બળીને ખાખ થઈ ગયો છે, જેનાથી ગોડાઉન માલિકોને મોટું આર્થિક નુકસાન થયું હોવાનો અંદાજ છે. ઘટનાની જાણ થતાં જ પોલીસ અને વહીવટીતંત્રના અધિકારીઓ પણ ઘટનાસ્થળે દોડી આવ્યા હતા. સદનસીબે, આ ભીષણ આગની ઘટનામાં કોઈ જાનહાનિના અહેવાલ નથી. આગ લાગવાનું ચોક્કસ કારણ જાણવા માટે હાલ તપાસ ચાલી રહી છે.