ગાંધીનગર : મુખ્યમંત્રી ભૂપેન્દ્ર પટેલના નેતૃત્વ હેઠળ ગુજરાત સરકારે મહેસૂલ વિભાગમાં ટેકનોલોજીનો ઉપયોગ કરીને વહીવટને પારદર્શક અને ઝડપી બનાવ્યો છે. રાજ્ય સરકારના સર્વાંગી સુધારાઓને કારણે આજે ખેડૂતો, ઉદ્યોગપતિઓ અને સામાન્ય નાગરિકો માટે જમીન નોંધણીથી લઈને બિન-કૃષિ (NA) પરવાનગી સુધીની પ્રક્રિયાઓ અત્યંત સરળ બની ગઈ છે. ગુજરાત હવે સુશાસનના રોલ મોડેલ તરીકે ઉભરી આવ્યું છે.
iORA પોર્ટલ: મહેસૂલી સેવાઓનું ડિજિટલ સરનામું
રાજ્યમાં જમીન ફાળવણી અને અન્ય પરવાનગીઓ માટે iORA (ઈ-ઓળખ) પોર્ટલ આશીર્વાદરૂપ સાબિત થયું છે. વર્ષ 2022 થી 18 ડિસેમ્બર 2025 સુધીમાં આ પોર્ટલ પર 36 થી વધુ સેવાઓ માટે 17.9 લાખથી વધુ અરજીઓ પર પ્રક્રિયા કરવામાં આવી છે. હવે નાગરિકોએ 7/12 ના ઉતારા, વારસાઈ રેકોર્ડ કે પ્રોપર્ટી કાર્ડ માટે કચેરીઓના ધક્કા ખાવાની જરૂર નથી. QR કોડ સાથેની ડિજિટલી સહી કરેલી નકલો ઓનલાઈન જ મળી રહી છે.
AI અને ઇસરોની ટેકનોલોજીથી અતિક્રમણ પર એરસ્ટ્રાઈક
ગુજરાત મહેસૂલ વિભાગે ISRO ની સેટેલાઈટ ટેકનોલોજી અને આર્ટિફિશિયલ ઇન્ટેલિજન્સ (AI) નો ઉપયોગ કરીને રાજ્યની જમીનનું હાઈ-રિઝોલ્યુશન મેપિંગ કર્યું છે. આ આધુનિક સિસ્ટમ દ્વારા સરકારી જમીન પર થતા ગેરકાયદેસર અતિક્રમણને તુરંત પકડી પાડવામાં આવે છે. અત્યાર સુધીમાં આ અભિયાન હેઠળ 3,990 હેક્ટરથી વધુ જમીન મુક્ત કરાવી છે, જેની બજાર કિંમત અંદાજે ₹3,339 કરોડ થી વધુ થાય છે.
ગતિશક્તિ પોર્ટલથી ખેડૂતોને ઝડપી વળતર
રાજ્યમાં ચાલતા મેગા પ્રોજેક્ટ્સ જેવા કે બુલેટ ટ્રેન, વડોદરા-મુંબઈ એક્સપ્રેસવે અને કેશોદ એરપોર્ટ માટે જમીન સંપાદનની પ્રક્રિયા ગતિશક્તિ પોર્ટલ દ્વારા ઝડપી બનાવવામાં આવી છે. આ સંકલનને કારણે ખેડૂતોને તેમની જમીનનું વળતર સમયસર અને સીધું બેંક ખાતામાં મળી રહ્યું છે, જેનાથી જમીન વિવાદોમાં પણ મોટો ઘટાડો થયો છે.
મુખ્યમંત્રી ભૂપેન્દ્ર પટેલના આ નિર્ણયો વડાપ્રધાન નરેન્દ્ર મોદીના 'વિકસિત ભારત @ 2047' ના વિઝનને સાકાર કરવા તરફ મક્કમ ડગલાં છે. 'મિનિમમ ગવર્મેન્ટ, મેક્સિમમ ગવર્નન્સ' ના સૂત્ર સાથે ગુજરાત હવે "કમ્ફર્ટ ઓફ ડુઇંગ બિઝનેસ" તરફ આગળ વધી રહ્યું છે.