અમદાવાદ: અમદાવાદના બિઝનેસ હબ ગણાતા સીજી રોડ પર પ્રોફેશનલ પ્રેક્ટિસના ઓઠા હેઠળ ચાલતા એક હાઈ-પ્રોફાઈલ સાયબર ક્રાઈમ રેકેટનો ક્રાઈમ બ્રાન્ચે પર્દાફાશ કર્યો છે. એક તરફ ચાર્ટર્ડ એકાઉન્ટન્ટ આકાશ સોની અને બીજી તરફ ૧૫ વર્ષનો બેંકિંગ અનુભવ ધરાવતો પૂર્વ મેનેજર મનોજ રામાવત - આ બંનેના ખતરનાક કોમ્બિનેશને સાયબર ગઠિયાઓ અને ક્રિકેટ સટ્ટાખોરો માટે 'સેફ પેસેજ' તૈયાર કર્યો હતો. અઢી વર્ષમાં ૫૪ જેટલી બોગસ કંપનીઓ બનાવી કરોડો રૂપિયાના કાળા નાણાંને ધોળા કરવાનો આ મસમોટો ખેલ જોઈને તપાસ એજન્સીઓ પણ ચોંકી ઉઠી છે. તેમની ઓફિસ પર પાડવામાં આવેલા દરોડામાં ₹૫૦ લાખની રોકડ મળતા આ કૌભાંડ કેટલું ઊંડું છે તેનો અંદાજ આવી શકે છે.
આ ઠગ ટોળકીની મોડસ ઓપરેન્ડી અત્યંત શાતિર અને પદ્ધતિસરની હતી. તેઓ ગરીબ મજૂરો અને જરૂરિયાતમંદ લોકોના આધારકાર્ડ અને પાનકાર્ડ જેવા દસ્તાવેજો માત્ર થોડા હજાર રૂપિયાની લાલચ આપીને મેળવી લેતા હતા. ત્યારબાદ આ દસ્તાવેજોના આધારે બેંક મેનેજરના અનુભવનો ઉપયોગ કરી ત્રીજી વ્યક્તિના નામે ખાતા ખોલાવી દેતા. એકાઉન્ટમાં રજિસ્ટર્ડ મોબાઈલ નંબર પણ પોતાનો જ રાખતા જેથી મૂળ ખાતાધારકને ખબર જ ન પડે કે તેના નામે કરોડોની હેરાફેરી થઈ રહી છે. આ 'મ્યુલ એકાઉન્ટ્સ' (ભાડે આપેલા ખાતા) નો ઉપયોગ દુબઈ બેઠેલા માફિયાઓ ભારતીયોને લૂંટવા માટે કરતા હતા.
તપાસમાં સૌથી મોટો ખુલાસો એ થયો છે કે આ નેટવર્કના તાર સીધા દુબઈના અનિલ ઠક્કર સાથે જોડાયેલા છે. સાયબર ફ્રોડ અને ઓનલાઈન જુગારમાં હારેલા કે છેતરાયેલા લોકોના પૈસા આ બોગસ કંપનીઓના ખાતામાં જમા થતા હતા. આ રકમને રોકડમાં ફેરવવા માટે આરોપીઓ એપીએમસી (APMC) ના નામે એન્ટ્રીઓ પાડતા અને આરટીજીએસ (RTGS) દ્વારા નાણાંની અદલાબદલી કરી કમિશનની મલાઈ ખાતા હતા. ક્રાઈમ બ્રાન્ચે આ મામલે જય નાઈ અને તેજસ જોષીની પણ ધરપકડ કરી છે, જેઓ 'મ્યુલ હંટ' ઓપરેશન હેઠળ સકંજામાં આવ્યા છે. આ ટોળકીએ સરકારી સિસ્ટમમાં રહેલી ખામીઓનો ભરપૂર ગેરફાયદો ઉઠાવ્યો હતો.
અમદાવાદ ક્રાઈમ બ્રાન્ચ હવે આ ૫૪ કંપનીઓના બેંક સ્ટેટમેન્ટ્સ અને ટ્રાન્ઝેક્શન હિસ્ટ્રી તપાસી રહી છે. પ્રાથમિક અંદાજ મુજબ આ કૌભાંડનો આંકડો સો કરોડને પાર કરી શકે છે. ચાર્ટર્ડ એકાઉન્ટન્ટ જેવા જવાબદાર હોદ્દા પર બેસીને આ રીતે દેશની આર્થિક સુરક્ષા સાથે ચેડાં કરનારા આકાશ સોની અને તેના સાથીદારોની મિલકતો ટાંચમાં લેવાની કાર્યવાહી પણ શરૂ થઈ શકે છે. આ કેસ એ સાબિત કરે છે કે હવે સાયબર ગુનેગારો માત્ર અજાણ્યા ઠગ નથી, પરંતુ તમારી આસપાસ રહેલા ભણેલા-ગણેલા વ્યાવસાયિકો પણ હોઈ શકે છે.