સાબરકાંઠા જિલ્લાના હિંમતનગરમાં ખોરાક અને ઔષધ નિયમન તંત્રની કચેરીમાં કરાર આધારિત મહિલા કોમ્પ્યુટર ઓપરેટર મમતા કુમારી ખરાડીને લાંચ લેતા ઝડપી પાડવામાં આવ્યા છે. હિંમતનગર ACBએ તેમને ₹4500ની લાંચ લેતા રંગે હાથ પકડ્યા હતા. 

ફરિયાદીને ઈંડાની લારી ચલાવવા માટે લાયસન્સ મેળવવાનું હતું. આ માટે તેઓ હિંમતનગરના બહુમાળી ભવનમાં આવેલી ફૂડ એન્ડ ડ્રગ્સ કચેરીમાં મમતા કુમારી ખરાડીને મળ્યા હતા. મમતા કુમારીએ લાયસન્સ કાઢી આપવા માટે ₹4500ની લાંચની માંગણી કરી હતી.

ફરિયાદી લાંચના પૈસા આપવા માંગતા ન હોવાથી તેમણે હિંમતનગર ACBનો સંપર્ક કર્યો હતો. ACBએ ફરિયાદના આધારે છટકું ગોઠવ્યું હતું. આ છટકા દરમિયાન મમતા કુમારી ખરાડીએ ફરિયાદી પાસેથી ₹4500ની લાંચ સ્વીકારતા તેમને ફૂડ એન્ડ ડ્રગ કચેરીમાંથી જ રંગે હાથ ઝડપી લેવામાં આવ્યા હતા. ACBએ આગળની કાર્યવાહી હાથ ધરી છે.