સુરત:  ડાયમંડ સિટી સુરતના રામપુરા વિસ્તારમાં એક અત્યંત કરુણ અને ચોંકાવનારી ઘટના સામે આવી છે. માત્ર ૨૩ વર્ષની ઉંમરના દાનીશ નામના યુવકે પોતાના જ ઘરના ચોથા માળેથી પડતું મૂકીને જીવન ટૂંકાવી લીધું છે. મળતી માહિતી મુજબ, દાનીશ અગાઉ હીરાની ઓફિસમાં કામ કરતો હતો, પરંતુ છેલ્લા કેટલાક સમયથી તે કોઈ કામધંધા વગર રખડતો હતો. પુત્રના ભવિષ્યની ચિંતામાં પિતા મોહમ્મદ મુનાફભાઈએ તેને કામ પર જવા અને રખડપટ્ટી બંધ કરવા બાબતે ઠપકો આપ્યો હતો. પિતાનો આ સાધારણ ઠપકો પુત્ર માટે આટલો આઘાતજનક સાબિત થશે તેની કલ્પના પણ કોઈએ કરી ન હતી.
આ સમગ્ર ઘટનાના કાળજું કંપાવી દે તેવા સીસીટીવી ફૂટેજ પણ સોશિયલ મીડિયા પર સામે આવ્યા છે. ૨૬ ડિસેમ્બરની મોડી રાત્રે જ્યારે આસપાસના લોકો પોતાના કામમાં વ્યસ્ત હતા, ત્યારે અચાનક ચોથા માળેથી દાનીશ નીચે ઉભેલા એક ટેમ્પા પર પટકાયો હતો. ધડાકાભેર અવાજ આવતા જ આસપાસના લોકો લોહીલુહાણ હાલતમાં પડેલા યુવકની મદદ માટે દોડી આવ્યા હતા. ગંભીર રીતે ઇજાગ્રસ્ત દાનીશને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો, પરંતુ કમનસીબે સારવાર મળે તે પહેલા જ તબીબોએ તેને મૃત જાહેર કર્યો હતો.
પરિવારજનોના જણાવ્યા અનુસાર, દાનીશ તેમના પરિવારનો એકનો એક પુત્ર હતો. પિતાએ હંમેશની જેમ તેને સારી સલાહ આપી હતી કે યુવાન વયે મહેનત કરવી જોઈએ, પરંતુ પિતાના શબ્દો તેને એટલા ખરાબ લાગી ગયા કે તેણે પોતાની જિંદગી જ ખતમ કરવાનો નિર્ણય લઈ લીધો. પિતાના ઠપકાનું માઠું લાગી આવતા યુવકે લીધેલા આ આત્યંતિક પગલાને કારણે આખો પરિવાર વેરવિખેર થઈ ગયો છે. પિતા હવે પસ્તાવો કરી રહ્યા છે કે કાશ તેમણે પુત્રને ટોક્યો ન હોત, તો આજે તેમનો લાડકવાયો તેમની નજર સામે હોત.
સુરત પોલીસ દ્વારા આ મામલે અકસ્માતે મોતનો ગુનો નોંધી વધુ તપાસ હાથ ધરવામાં આવી છે. આ ઘટનાએ આજના યુવાનોમાં ઘટતી જતી માનસિક સહનશક્તિ અને નાની નાની વાતોમાં ડિપ્રેશનમાં આવી જવાના કિસ્સાઓ પર લાલબત્તી ધરી છે. મનોચિકિત્સકોના મતે, પરિવારમાં સંવાદની કમી અને અપેક્ષાઓનું દબાણ ઘણીવાર યુવાનોને આવા ખોટા રસ્તે દોરી જાય છે. રામપુરા રામવાડી વિસ્તારમાં બનેલી આ ઘટનાથી સમગ્ર મહોલ્લામાં શોકનું મોજું ફરી વળ્યું છે અને સીસીટીવી ફૂટેજ જોઈને લોકોના રુંવાડા ઉભા થઈ રહ્યા છે.