રાજકોટ, તા. ૧ જાન્યુઆરી ૨૦૨૬ : નવા વર્ષના પ્રથમ દિવસે જ ગુજરાત સરકારે પોલીસ પ્રશાસનમાં મોટી હલચલ મચાવતા રાજ્યના ૧૪ જેટલા વરિષ્ઠ આઈપીએસ (IPS) અધિકારીઓને બઢતીના આદેશ આપ્યા છે. રાજ્યપાલના હુકમથી ગૃહ વિભાગના પ્રિન્સિપલ સેક્રેટરી સંજીવ કુમાર દ્વારા જારી કરાયેલા નોટિફિકેશન મુજબ, વિવિધ રેન્કના અધિકારીઓને તેમની કામગીરી અને સિનિયોરિટીના આધારે ઉચ્ચ હોદ્દાઓ પર બઢતી આપવામાં આવી છે.
ત્રણ અધિકારીઓની DGP ગ્રેડમાં બઢતી:
રાજ્ય સરકારે ૧૯૯૬ બેચના ત્રણ સિનિયર અધિકારીઓને એડિશનલ ડાયરેક્ટર જનરલ (ADGP) માંથી પ્રમોશન આપી ડાયરેક્ટર જનરલ ઓફ પોલીસ (DGP) ગ્રેડમાં મૂક્યા છે.
 * નરસિમ્હા એન. કોમર: વડોદરા શહેરના પોલીસ કમિશનર તરીકે ફરજ બજાવતા કોમરને DGP ગ્રેડમાં બઢતી આપી એ જ સ્થાને કાર્યરત રખાયા છે.
 * ડૉ. પ્રફુલ્લા કુમાર રોશન: રાજકોટ આર્મ્ડ યુનિટના ADGP ને હવે DGP (આર્મ્ડ યુનિટ) તરીકે બઢતી આપવામાં આવી છે.
 * ડૉ. એસ. પાંડિયા રાજકુમાર: ગાંધીનગર ખાતે ADGP (લો એન્ડ ઓર્ડર) તરીકે સેવા આપતા રાજકુમારને હવે DGP (લો એન્ડ ઓર્ડર) ના હોદ્દા પર બઢતી મળી છે.
IGP અને DIGP ગ્રેડમાં બઢતી:
 * નીરજ કુમાર બડગુજર: અમદાવાદ સેક્ટર-૧ ના એડિશનલ કમિશનરને ઇન્સ્પેક્ટર જનરલ (IGP) ગ્રેડમાં બઢતી આપી જોઈન્ટ પોલીસ કમિશનર, સેક્ટર-૧ તરીકે નિયુક્ત કરાયા છે.
 * ડૉ. કરણરાજ વાઘેલા: સુરત શહેરના ઇકોનોમિક વિંગના DCP ને બઢતી આપી એડિશનલ કમિશનર (ઇકોનોમિક વિંગ) બનાવવામાં આવ્યા છે.
 * ડૉ. સુધીરકુમાર જે. દેસાઈ: ગાંધીનગર ઇન્ટેલિજન્સના એસપીને હવે ડેપ્યુટી ઇન્સ્પેક્ટર જનરલ (DIGP) ઇન્ટેલિજન્સ તરીકે પ્રોમોશન મળ્યું છે.
 * બલરામ મીના: રાજ્યપાલના એડીસી (ADC) તરીકે કાર્યરત મીનાને પણ DIGP ગ્રેડમાં બઢતી અપાઈ છે.
 * એસ. વી. પરમાર: મહેસાણા SRPF ગ્રુપ-૧૫ ના કમાન્ડન્ટને DIGP તરીકે બઢતી મળી છે.
 * એ. એમ. મુનિયા: ગોધરા SRPF ગ્રુપ-૫ ના કમાન્ડન્ટને પણ DIGP ગ્રેડમાં બઢતી આપવામાં આવી છે.
ડેપ્યુટેશન પર રહેલા અધિકારીઓને પ્રોફોર્મા બઢતી:
કેન્દ્રીય ડેપ્યુટેશન પર રહેલા અધિકારીઓને પણ સરકારે યાદ કર્યા છે, જેમાં દિલ્હી ખાતે ફરજ બજાવતા ડૉ. વિપુલ અગ્રવાલને ADGP ગ્રેડમાં પ્રોફોર્મા બઢતી અપાઈ છે. આ ઉપરાંત, જમ્મુ-કાશ્મીર ખાતે ડેપ્યુટેશન પર રહેલા સારા રિઝવી, ઇન્ટેલિજન્સ બ્યુરોમાં ફરજ બજાવતા શોભા ભૂતડા અને પ્રદીપ ભીમરાવ શેજુલને IGP ગ્રેડમાં બઢતી આપવામાં આવી છે. કેબિનેટ સચિવાલયમાં ફરજ બજાવતા સૌરભ સિંહને DIGP ગ્રેડમાં પ્રોફોર્મા બઢતી મળી છે.
સરકારના આ મહત્વના નિર્ણયથી પોલીસ વિભાગમાં ખુશીનો માહોલ જોવા મળી રહ્યો છે અને આ તમામ નિમણૂકો તાત્કાલિક અસરથી અમલી બનાવવાની સૂચના આપવામાં આવી છે.