અમદાવાદ : ગુજરાતમાં રમતગમત ક્ષેત્રે માળખાગત સુવિધાઓ વધારવા માટે સરકારે સરદાર વલ્લભભાઈ પટેલ (એસવીપી) સ્પોર્ટ્સ એન્ક્લેવ પ્રોજેક્ટને વેગ આપ્યો છે. આ મહત્વકાંક્ષી પ્રોજેક્ટ માટે અમદાવાદ અને ગાંધીનગરના કુલ પાંચ ગામોની જમીનનો ઉપયોગ કરવામાં આવશે. જેમાં અચર, ભાટ, હંસોલ, કોટેશ્વર અને મોટેરા ગામનો સમાવેશ થાય છે.

આ પ્રોજેક્ટ કુલ ૧૨૫ હેક્ટર વિસ્તારમાં ફેલાયેલો હશે. મળતી માહિતી મુજબ, આ એન્ક્લેવમાં કુલ બાંધકામ વિસ્તાર ૧,૫૦,૦૦૦ ચોરસ મીટરથી પણ વધુ હશે, જે ભવિષ્યમાં આંતરરાષ્ટ્રીય સ્તરની રમતગમત સ્પર્ધાઓ માટે મહત્વનું કેન્દ્ર બની રહેશે.