અમદાવાદ: ગુજરાતમાં અત્યારે મિશ્ર ઋતુનો વિચિત્ર અનુભવ થઈ રહ્યો છે, જ્યાં દિવસે ગરમી અને રાત્રે કડકડતી ઠંડી પડી રહી છે. પરંતુ હવે હવામાન વિભાગની નવી આગાહીએ લોકોની ઊંઘ ઉડાવી દીધી છે. ઉત્તર ભારતમાંથી આવતા બર્ફીલા પવનોના જોર વચ્ચે પવનોની દિશામાં પલટો આવતા રાજ્યમાં ઠંડીનું જોર વધવાની સાથે કમોસમી વરસાદ એટલે કે માવઠાની આશંકા સેવાઈ રહી છે. આ બેવડી ઋતુની અસરને કારણે સામાન્ય જનજીવન તો પ્રભાવિત થશે જ, પરંતુ સૌથી મોટું સંકટ ખેતી પર તોળાઈ રહ્યું છે. વાતાવરણમાં આવનારા આ અચાનક પલટાને કારણે રવિ પાકને વ્યાપક નુકસાન થવાની ભીતિએ ખેડૂતોમાં ભારે ફાળ પડી છે.

ઉત્તર ભારત અત્યારે ગાઢ ધુમ્મસ અને કાતિલ શીત લહેરની ઝપેટમાં છે. દિલ્હી, ઉત્તર પ્રદેશ અને પંજાબ જેવા રાજ્યોમાં વિઝિબિલિટી શૂન્ય થઈ જતાં ટ્રેનો અને ફ્લાઈટ્સના શિડ્યુલ વેરવિખેર થઈ ગયા છે. આ હિમાલયની ઠંડીની સીધી અસર ગુજરાત પર પડી રહી છે. રાજ્યમાં લઘુત્તમ તાપમાન સતત ગગડી રહ્યું છે, જેમાં નલિયા 10.03 ડિગ્રી સાથે સૌથી ઠંડુગાર શહેર નોંધાયું છે. હવામાન વિભાગના મતે, આગામી અઠવાડિયામાં ઠંડીનું પ્રમાણ હજુ પણ વધી શકે છે, જેની સાથે દરિયાઈ ભેજ ભળતા માવઠા જેવી સ્થિતિ સર્જાવાની પૂરેપૂરી શક્યતા છે.

હવામાન વિભાગના આંકડા મુજબ, રાજ્યના વિવિધ શહેરોમાં પારો સરેરાશ 10 થી 15 ડિગ્રીની વચ્ચે રમી રહ્યો છે. અમરેલીમાં 10.8 ડિગ્રી અને દીવમાં 11.8 ડિગ્રી સાથે ઠંડીનો ચમકારો અનુભવાઈ રહ્યો છે, જ્યારે ગાંધીનગર અને અમદાવાદમાં તાપમાન 12 થી 15 ડિગ્રીની આસપાસ સ્થિર છે. જોકે, 23મી જાન્યુઆરી સુધી હવામાન શુષ્ક રહેવાની સત્તાવાર આગાહી છે, પરંતુ પવનોની દિશા જે રીતે બદલાઈ રહી છે તે જોતા જાન્યુઆરીના અંતિમ સપ્તાહમાં ઉત્તર અને સૌરાષ્ટ્રના કેટલાક ભાગોમાં છૂટોછવાયો વરસાદ વરસી શકે છે. આ માવઠું જીરું, ઘઉં અને રાયડા જેવા પાકો માટે શત્રુ સાબિત થઈ શકે છે.

ચાલુ સિઝનમાં ઠંડીના વિવિધ રાઉન્ડ બાદ હવે માવઠાની એન્ટ્રી થતા વહીવટી તંત્ર અને ખેડૂતો બંને એલર્ટ મોડ પર છે. એકબાજુ શહેરી વિસ્તારોમાં લોકો સ્વેટર અને મફલરના સહારે ઠંડી સામે રક્ષણ મેળવી રહ્યા છે, તો બીજી બાજુ ખેતરોમાં ઉભેલા પાકને બચાવવા ખેડૂતો પ્રાર્થના કરી રહ્યા છે. જો આગામી દિવસોમાં વરસાદ પડે છે, તો રોગચાળો ફાટી નીકળવાની પણ શક્યતા છે. હાલ પૂરતું તો ગુજરાતીઓ ઠંડી અને ગરમી વચ્ચેના આ સંતાકૂકડીના ખેલમાં અટવાયા છે અને આવનારા દિવસોમાં આકાશમાંથી વરસતી આફતની આશંકાએ ફફડી રહ્યા છે.