અમદાવાદ :રાજ્યના વાતાવરણમાં અચાનક પલટો નોંધાયો છે. હવામાન વિભાગ દ્વારા દક્ષિણ ગુજરાતના વિસ્તારો માટે કમોસમી વરસાદની આગાહી કરવામાં આવી છે. ખાસ કરીને આગામી કલાકોમાં હવામાનમાં ઝડપી ફેરફાર થવાની શક્યતા વ્યક્ત કરવામાં આવી છે.

હવામાન વિભાગે સવારે 11 વાગ્યા સુધી માટે પાંચ જિલ્લાઓમાં નાઉકાસ્ટ જાહેર કર્યું છે. તેમાં સુરત, ભરૂચ, તાપી, નર્મદા અને છોટા ઉદેપુર જિલ્લાઓમાં કમોસમી વરસાદની શક્યતા દર્શાવવામાં આવી છે. કેટલાક વિસ્તારોમાં ગાજવીજ સાથે છૂટાછવાયા ઝાપટાં પડી શકે છે.

આ પરિસ્થિતિને ધ્યાનમાં રાખીને હવામાન વિભાગે યેલો એલર્ટ પણ જાહેર કર્યું છે. ખેડૂતોને ખાસ સાવચેતી રાખવાની સલાહ આપવામાં આવી છે, કારણ કે આ અચાનક વરસાદ પાકને અસર કરી શકે છે. ખાસ કરીને કાપણી માટે તૈયાર ઉભા પાકને નુકસાન થવાની ભીતિ વ્યક્ત કરવામાં આવી રહી છે

અમદાવાદ સહિત રાજ્યના અનેક જિલ્લાઓમાં વાદળછાયું વાતાવરણ જોવા મળી રહ્યું છે. તાપમાનમાં થોડો ઘટાડો નોંધાયો છે અને પવનની ગતિમાં પણ વધારો થયો છે. હવામાન નિષ્ણાતોના જણાવ્યા મુજબ પશ્ચિમ દિશાથી આવતી ભેજયુક્ત પવન અને વાતાવરણમાં સર્જાયેલા દબાણના ફેરફારને કારણે આ પરિસ્થિતિ ઊભી થઈ છે. આગામી 24 કલાક સુધી વાતાવરણ અસ્થિર રહેવાની શક્યતા વ્યક્ત કરવામાં આવી છે.

નાગરિકોને અનાવશ્યક મુસાફરી ટાળવા અને વીજળી-ગાજવીજ દરમિયાન ખુલ્લા મેદાનોમાં ન જવાની સૂચના આપવામાં આવી છે. હવામાન વિભાગની તાજી અપડેટ પર નજર રાખવાની પણ અપીલ કરવામાં આવી છે.