જમીન વેચાણ કર્યા બાદ કેપિટલ ગેઈન ટેક્સની ચુકવણી કરવામાં અસમંજસતા
સોદો નક્કી કર્યા બાદ ૪ વર્ષે કરાતા તમામ નાણાંની ચુકવણી
મુંબઈ,તા.૨૪: જમીનનું વેચાણ કરવામાં આવ્યા બાદ તે માટે સાટાખત બનાવવામાં આવે છે. તેમજ નાણાંની ચુકવણી માટે સમયમર્યાદા નક્કી કરી દેવામાં આવતી હોય છે. જયારે કેટલાક કિસ્સામાં દસ્તાવેજ બનાવીને પોસ્ટ ડેટેડ ચેક આપવામાં આવતા હોય છે. જેમાં જમીન વેચનારને ચારથી પાંચ વર્ષે તમામ નાણાં મળતા હોય છે. આવા સંજોગોમાં જમીન વેચનારે કેપિટલ ગેઇન ટેક્સ ભરવામાં અસમંજસની સ્થિતિ ઊભી થતી હોય છે, કારણ કે ઈન્કમટેક્સમાં એવો કોઈ નિયમ જ નથી કે ચાર વર્ષે નાણાં ચૂકવવામાં આવે તો કેપિટલ ગેઈન ટેક્સ કેવી રીતે ભરવાનો થાય. તેના બદલે એવો નિયમ છે કે જમીન વેચનારે દસ્તાવેજ કરાવી દીધો હોય એટલે તેણે કેપિટલ ગેઇન ટેક્સ ભરી દેવાનો હોય છે. નાણાંની ચુકવણી મોડી થવાના કારણે અનેક ખેડૂતો દ્વારા હાલ તો ઈન્કમટેક્સ વિભાગે એવો જવાબ આપી રહ્યા છે કે નાણાંની પૂરેપૂરી ચૂકવણી જ કરવામાં આવી નથી તો કેપિટલ ગેઇન ટેક્સ કેવી રીતે ભરીએ.
ખેડૂત દ્વારા જમીનનું વેચાણ કરવામાં આવે એટલે ઇન્કમટેક્સના નિયમ પ્રમાણે ૧૨.૫ ટકા લેખે કેપિટલ ગેઇન ટેક્સ ભરવાનો થતો હોય છે. પરંતુ હાલમાં જે રીતે જમીનના સોદા થઈ રહ્યા છે તેમાં જમીનનું વેચાણ કરવામાં આવ્યા બાદ તમામ નાણાંની ચુકવણી ચારથી પાંચ વર્ષે કરવામાં આવે છે. તે માટેના ચેક પણ ખેડૂતને આપી દેવામાં આવતા હોય છે. તેની વિગતો સાથે દસ્તાવેજ કરવામાં આવતો હોય છે. હવે આઈટીના નિયમ પ્રમાણે દસ્તાવેજ કરવામાં આવ્યો હોય એટલે કેપિટલ ગેઈન ટેક્સ ભરી દેવાનો છે. ત્યારે સામે પક્ષે એટલે કે ખેડૂત દ્વારા એવું જણાવવામાં આવે છે કે જમીન વેચાણ કરવામાં આવી છે. તેમાં દસ્તાવેજ પણ કરી દેવામાં આવ્યો છે. પરંતુ તે પેટે તમામ રકમની ચુકવણી કરવા માટે ચારથી પાંચ વર્ષના પુરાવા પણ રજૂ કરવામાં આવે છે. તેના કારણે હાલ તો કેપિટલ ગેઈન ટેક્સ ભરવા માટે ખેડૂતોમાં અસમંજસની સ્થિતિ જોવા મળી રહી છે.
કેપિટલ ગેઇન ટેક્સ ભરાય તેટલી પણ રકમ ચૂકવાતી નથી
જમીન ખરીદનાર દ્વારા જે પણ રકમ આપવામાં આવે તેમાં મોટાભાગની રકમ તો સ્ટેમ્પ ડયુટી ભરવા માટે જ જતી રહેતી હોય છે. જ્યારે તેની પાસે જે રકમ બચે તે રકમ એટલી ઓછી હોય કે તેમાંથી કેપિટલ ગેઇન ટેક્સ ભરી શકે તેવી સ્થિતિ હોતી નથી. તેના કારણે જમીન વેચાણ કર્યા બાદ પણ ખેડુતો કેપિટલ ગેઇન ટેક્સ ભરી શકતા નથી. જ્યારે ઇન્કમટેક્સ વિભાગ દ્વારા કેપિટલ ગેઇન ટેક્સ નહીં ભરવાના કારણે ખેડૂતોને નોટિસ આપવાની કાર્યવાહી હાથ ધરવાની શરૂ કરતા હોય છે. જ્યારે નોટિસ આપ્યા બાદ ખેડૂતો દ્વારા ઉપરોક્ત હકીકત વર્ણવતા હોય છે.
(10:24 AM IST)
છેલ્લા 8 દિવસમાં સૌથી લોકપ્રિય 
