ગાંધીનગર: કોમનવેલ્થ ગેમ્સ (CWG) ના આયોજનને ધ્યાનમાં રાખીને અમદાવાદ અને ગાંધીનગરમાં તડામાર તૈયારીઓ શરૂ થઈ ગઈ છે. અમદાવાદને ઓલિમ્પિક માટે સજ્જ શહેર તરીકે વિકસાવવાના પ્રયાસોની સાથે હવે પર્યાવરણને અનુકૂળ રિન્યુએબલ એનર્જી પહેલ પર વિશેષ ધ્યાન કેન્દ્રિત કરવામાં આવી રહ્યું છે. આ અંતર્ગત શહેરમાં ફ્લોટિંગ સોલાર પ્રોજેક્ટ્સ અમલમાં મૂકવાની યોજના ઘડવામાં આવી રહી છે.
જળાશયો અને સાબરમતી પર સોલાર પેનલ્સ
આ નવતર યોજના મુજબ, અમદાવાદની સાબરમતી નદી સહિતના વિવિધ જળાશયો અને તળાવો જ્યાં પૂરતા પ્રમાણમાં પાણી ઉપલબ્ધ છે, ત્યાં તરતા સોલાર પેનલ્સ (Floating Solar Panels) સ્થાપિત કરવામાં આવશે. આ પ્રોજેક્ટ દ્વારા અંદાજે ૧૨૫ મેગાવોટ જેટલી રિન્યુએબલ એનર્જી ઉત્પન્ન થવાની અપેક્ષા છે. આ ઉર્જાનો મુખ્ય ઉપયોગ કોમનવેલ્થ ગેમ્સ સાથે સંકળાયેલા સ્પોર્ટ્સ ઇન્ફ્રાસ્ટ્રક્ચર અને રમતગમતના સંકુલમાં કરવામાં આવશે.
પ્રદૂષણ મુક્ત અને ગ્રીન ટ્રાન્સપોર્ટેશન
રમતગમતના આયોજનની સાથે બંને શહેરોમાં પ્રદૂષણ ઘટાડવા અને એર ક્વોલિટી ઇન્ડેક્સ (AQI) સુધારવા માટે વ્યાપક આયોજન હાથ ધરવામાં આવ્યું છે. આ માટે ગ્રીન પબ્લિક ટ્રાન્સપોર્ટેશન સિસ્ટમ વિકસાવવા પર ભાર મૂકવામાં આવી રહ્યો છે. ઈલેક્ટ્રિક વાહનો અને પર્યાવરણને નુકસાન ન પહોંચાડે તેવી પરિવહન વ્યવસ્થા દ્વારા વાયુ પ્રદૂષણ અંકુશમાં લેવાની નેમ છે.
કોર્પોરેશનને સોંપાઈ જવાબદારી
આ તમામ પર્યાવરણલક્ષી અને માળખાગત સુવિધાઓના પ્રોજેક્ટ્સના અમલીકરણની જવાબદારી અમદાવાદ અને ગાંધીનગર મ્યુનિસિપલ કોર્પોરેશનને સોંપવામાં આવી છે. આ પ્રોજેક્ટ્સ દ્વારા બંને શહેરોને માત્ર રમતગમત માટે જ નહીં, પરંતુ એક આધુનિક અને પર્યાવરણ પ્રેમી ગ્રીન સિટી તરીકે વૈશ્વિક સ્તરે રજૂ કરવામાં આવશે.