અમદાવાદ : અમદાવાદમાં ગરમીની શરૂઆત થતાં જ તંત્રની કામગીરીની પોલ ખુલી ગઈ છે. લાલદરવાજા બસ રેપિડ ટ્રાન્ઝિટ માર્ગ પાસે રસ્તા પરનું ડામર પીગળવા લાગ્યું હોવાનું સામે આવ્યું છે. આશ્ચર્યની વાત એ છે કે આ રસ્તાનું નિર્માણ માત્ર 2 મહિના પહેલા જ કરવામાં આવ્યું હતું. ગરમી વધતા રસ્તા પરનું ડામર નરમ પડી જતા વાહનોના ટાયર પર ચોંટી રહ્યું છે, જેના કારણે વાહનચાલકોને મુશ્કેલીનો સામનો કરવો પડી રહ્યો છે. આ ઘટનાને લઈને રસ્તા નિર્માણની ગુણવત્તા પર સવાલો ઉઠી રહ્યા છે અને લાખો રૂપિયાના ખર્ચે બનતા રસ્તાઓમાં યોગ્ય ગુણવત્તાનું ધ્યાન કેમ રાખવામાં આવતું નથી તે અંગે ચર્ચા શરૂ થઈ છે.