ગાંધીનગર: ગુજરાત સરકારે રાજ્યના વહીવટી માળખામાં પારદર્શિતા લાવવા અને ઉચ્ચ અધિકારીઓની નિવૃત્તિ સમયે ઉભી થતી કાયદાકીય ગૂંચવણોને ટાળવા માટે એક ઐતિહાસિક નિર્ણય લીધો છે. વર્ગ-1 (Class-1) ના અધિકારીઓ સામે શિસ્તભંગની કાર્યવાહી કરવા માટે હવે સરકારે સમયમર્યાદા નક્કી કરી દીધી છે. નવા નિયમ મુજબ, જો કોઈ ઉચ્ચ અધિકારી સામે કોઈ તપાસ કે પગલાં લેવાના હોય, તો તેની દરખાસ્ત અધિકારી નિવૃત્ત થાય તેના ઓછામાં ઓછા ૧ મહિના પહેલાં મોકલવી ફરજિયાત રહેશે.
છેલ્લી ઘડીની 'ખેલદિલી' પર પ્રતિબંધ
અત્યાર સુધી એવું જોવા મળતું હતું કે ઘણા કિસ્સાઓમાં અધિકારીની નિવૃત્તિના છેલ્લા દિવસે અથવા છેલ્લા કલાકોમાં શિસ્ત કાર્યવાહીની ફાઈલો દોડાવવામાં આવતી હતી. આ પ્રથાને કારણે વહીવટી અને કાયદાકીય પ્રશ્નો ઉભા થતા હતા અને ઘણીવાર પેન્શનના લાભો અટકાવવામાં ટેકનિકલ ખામીઓ રહી જતી હતી. સામાન્ય વહીવટી વિભાગે સ્પષ્ટ કર્યું છે કે હવેથી આવી કોઈ પણ દરખાસ્ત સ્વીકારવામાં આવશે નહીં અને જો વિલંબ થશે તો તેની સીધી જવાબદારી જે-તે વિભાગના જવાબદાર અધિકારીની રહેશે.
વિવાદના કિસ્સામાં મુખ્યમંત્રી લેશે નિર્ણય
સરકારે આ પરિપત્રમાં એક અત્યંત મહત્વની જોગવાઈ કરી છે. જો કોઈ શિસ્ત કાર્યવાહીના કેસમાં સંબંધિત મંત્રી અને વિભાગના વડા (HOD) ના અભિપ્રાયો અલગ-અલગ હોય અથવા કોઈ પણ પ્રકારની વિસંગતતા જણાય, તો તેવો કિસ્સો સીધો મુખ્યમંત્રી સ્તર સુધી લઈ જવો પડશે. આખરી નિર્ણય લેવાની સત્તા મુખ્યમંત્રી પાસે રહેશે, જેથી કોઈ પણ પ્રકારના પક્ષપાત વગર વહીવટી નિર્ણય લઈ શકાય.
ખાસ કિસ્સામાં ૫ દિવસની મુદત
અત્યંત ગંભીર અથવા આકસ્મિક કિસ્સાઓ કે જેમાં વહેલી જાણ કરવી શક્ય ન હોય, તેવા સંજોગોમાં નિવૃત્તિના ઓછામાં ઓછા ૫ દિવસ અગાઉ મંજૂરી મેળવવી અનિવાર્ય રહેશે. સરકારના આ કડક વલણથી ઉચ્ચ અધિકારીઓમાં ફફડાટ વ્યાપી ગયો છે, પરંતુ સાથોસાથ પ્રામાણિક અધિકારીઓ માટે નિવૃત્તિ પછી મળતા લાભો જેવી કે પેન્શન અને ગ્રેચ્યુઈટીના વિવાદોમાં ઘટાડો થશે તેવી આશા સેવાઈ રહી છે.