રાજકોટ: ગુજરાતના લોકપ્રિય સમાજસેવી નીતિન જાની, જેઓ 'ખજૂરભાઈ' તરીકે ઓળખાય છે, અને સોશિયલ મીડિયા સ્ટાર લાલા આહીર વચ્ચેનો ઝઘડો હવે પર્સનલ એટેક અને કાયદાકીય ગૂંચવણો સુધી પહોંચી ગયો છે. આજે લાલા આહીરે સોશિયલ મીડિયા પર એક ચોંકાવનારો વીડિયો અપલોડ કર્યો છે, જેમાં નીતિન જાની સાથેની કથિત ટેલિફોનિક વાતચીતની ઓડિયો ક્લિપ જાહેર કરવામાં આવી છે. આ ક્લિપમાં નીતિન જાની અત્યંત ગુસ્સામાં અપશબ્દો બોલતા અને લાલા આહીર પર ઉશ્કેરાતા સંભળાય છે, જેણે આખા ગુજરાતમાં ચર્ચા જગાવી છે.
વિવાદની ચિંગારી ક્યાંથી ચંપી?
મળતી માહિતી મુજબ, આ વિવાદની શરૂઆત કોઈ મુદ્દે સપોર્ટ વીડિયો બનાવવાને લઈને થઈ હતી. લાલા આહીરનો દાવો છે કે નીતિન જાનીએ તેમને કોઈ વિષય પર સમર્થન આપવા કહ્યું હતું, પરંતુ લાલાભાઈએ વીડિયો ન બનાવતા ખજૂરભાઈ ઉશ્કેરાઈ ગયા હતા. વાયરલ ઓડિયોમાં નીતિન જાની કથિત રીતે લાલા આહીર વિરુદ્ધ અભદ્ર ભાષાનો પ્રયોગ કરી રહ્યા છે. સોશિયલ મીડિયા પર લોકો હવે સવાલ ઉઠાવી રહ્યા છે કે શું લોકોની મદદ કરતા સેલિબ્રિટીઝનો પડદા પાછળનો અસલી સ્વભાવ આવો હોય છે?
રૂપિયા અને સેટલમેન્ટના ગંભીર આક્ષેપો
આ ઓડિયો ક્લિપ માત્ર અપશબ્દો પૂરતી મર્યાદિત નથી, પરંતુ તેમાં નાણાકીય ગેરરીતિઓના સંકેતો પણ મળી રહ્યા છે. ક્લિપમાં નીતિન જાની 'રૂપિયા લઈને નીકળી જવાની' અને પોલીસ તથા વકીલોને રૂપિયા આપીને આખો મામલો દબાવી દેવાની વાતો કરતા સંભળાય છે. આ ગંભીર આક્ષેપોને કારણે ખજૂરભાઈની અત્યાર સુધીની સ્વચ્છ અને સેવાભાવી છબી પર મોટા પ્રશ્નાર્થ ચિહ્નો ઉભા થયા છે. બીજી તરફ, અગાઉ લાલા આહીર પર હુમલો થયો હોવાની અને ગાડીઓના કાચ તૂટ્યા હોવાની ઘટના પણ આ વિવાદ સાથે જોડવામાં આવી રહી છે.
સમર્થકો આમને-સામને: સોશિયલ વોર તેજ
આ વીડિયો વાયરલ થયા બાદ ફેસબુક અને ઈન્સ્ટાગ્રામ પર બંનેના ચાહકો વચ્ચે યુદ્ધ છેડાયું છે. લાલા આહીરના સમર્થકો આને સત્યનો વિજય ગણાવી રહ્યા છે, જ્યારે નીતિન જાનીના સમર્થકો આ ઓડિયો ક્લિપને એડિટ કરેલી અથવા તેમને બદનામ કરવાનું ષડયંત્ર ગણાવી રહ્યા છે. અત્યારે સમગ્ર ગુજરાતમાં આ 'સોશિયલ વોર' હોટ ટોપિક બની છે અને આગામી દિવસોમાં આ મામલો વધુ ઉગ્ર બને તેવી શક્યતા છે.