ગાંધીનગર : ગુજરાતના ખેડૂતોને ખેતીમાં સિંચાઈના પાણીની સમસ્યાથી કાયમી ઉકેલ અપાવવા માટે રાજ્ય સરકારે એક મહત્વકાંક્ષી 'ખેત તલાવડીમાં જીઓમેમ્બ્રેન ફીટ કરી આપવાની યોજના' (૯૦૮૫) શરૂ કરી છે. સામાન્ય રીતે ખેત તલાવડીમાં પાણી ભરાયા બાદ તે જમીનમાં ઉતરી જતું હોય છે, પરંતુ જો તેમાં જીઓમેમ્બ્રેન (ખાસ પ્રકારનું પ્લાસ્ટિક પડ) ફીટ કરવામાં આવે, તો પાણીનો લાંબા સમય સુધી સંગ્રહ કરી શકાય છે. આ યોજના હેઠળ સરકાર ખેડૂતોને વિનામૂલ્યે આ સુવિધા પૂરી પાડશે.
આ યોજનાનો મુખ્ય હેતુ ચોમાસાના પાણીને સાચવી રાખવાનો છે, જેથી જ્યારે વરસાદ ખેંચાય ત્યારે અથવા રવિ સીઝનમાં ખેડૂતો પોતાના પાકને પૂરક સિંચાઈ આપી શકે. આનાથી માત્ર પાકની ઉપજમાં વધારો જ નથી થતો, પરંતુ ભૂગર્ભજળ બચાવવામાં પણ મોટી મદદ મળે છે.
યોજનાની મુખ્ય વિગતો અને પાત્રતા
આ યોજનામાં સરકાર કોઈ રોકડ સહાય આપવાને બદલે સીધું જીઓમેમ્બ્રેન સાધન ફીટ કરી આપે છે. આ માટેના મુખ્ય માપદંડો નીચે મુજબ છે:
•    લાભાર્થી: જે ખેડૂતોએ પોતાના ખર્ચે ખેત તલાવડીનું ખોદકામ કર્યું હોય, તેમને સરકાર જીઓમેમ્બ્રેન ફીટ કરી આપશે.
•    જિલ્લાઓ: આ યોજના હાલમાં બનાસકાંઠા, મહેસાણા, પાટણ, કચ્છ, રાજકોટ, બોટાદ, ભાવનગર, સુરેન્દ્રનગર, નર્મદા અને ડાંગ એમ કુલ ૧૦ જિલ્લાઓમાં અમલી છે.
•    માપદંડ: તલાવડીની લઘુત્તમ સાઈઝ ૧૫ x ૧૫ x ૩ મીટર હોવી જોઈએ, જ્યારે મહત્તમ ૪૦ x ૪૦ x ૬ મીટર સુધીની સાઈઝમાં સરકાર સહાય આપશે.
 
અરજી માટે જરૂરી દસ્તાવેજો
યોજનાનો લાભ લેવા ઈચ્છતા ખેડૂતોએ નીચે મુજબના ડોક્યુમેન્ટ્સ તૈયાર રાખવાના રહેશે:
૧. લેટેસ્ટ ૭/૧૨, ૮-અ અને ૬-અ ના ઉતારાની નકલ.
૨. આધાર કાર્ડની નકલ.
૩. બાંહેધરી પત્રક (સોગંદનામું).
 
કેવી રીતે કરવી અરજી?
ખેડૂતો આ યોજના માટે ઓનલાઈન પોર્ટલ https://g-talavadi.gujarat.gov.in પર જઈને નોંધણી કરાવી શકે છે. અરજી કરવા માટે કોઈ પણ પ્રકારની ફી ચૂકવવાની રહેતી નથી.
ગોંડલ માર્કેટ યાર્ડમાં કેરીની ધૂમ આવક
ખેતીવાડીના અન્ય એક સમાચાર મુજબ, ગોંડલ માર્કેટ યાર્ડમાં સીઝનની શરૂઆતમાં જ ૧૬૮૦ કિલો કેસર કેરીની આવક નોંધાઈ છે. કેરીના રસિકો માટે આ સારા સમાચાર છે, જોકે શરૂઆતના ભાવ પ્રમાણમાં ઊંચા જોવા મળી રહ્યા છે.