બનાસકાંઠા જિલ્લાના સુપ્રસિદ્ધ યાત્રાધામ અંબાજી સહિત દાંતા અને હડાદ પંથકમાં આજે વાતાવરણમાં જોરદાર પલટો જોવા મળ્યો છે. હવામાન વિભાગની આગાહીના પગલે બપોર બાદ અચાનક આકાશ વાદળોથી ઘેરાઈ ગયું હતું અને અનેક વિસ્તારોમાં કમોસમી વરસાદ એટલે કે માવઠું પડતા સમગ્ર પંથકમાં ઠંડક પ્રસરી ગઈ છે.

અંબાજીમાં વરસાદી માહોલ જામ્યો છે, તો બીજી તરફ દાંતા પંથકમાં વરસાદી ઝાપટાં પડ્યા હતા. હડાદ પંથકમાં ભારે પવન ફૂંકાવાને કારણે વાવાઝોડા જેવી પરિસ્થિતિ સર્જાઈ હતી, જેના લીધે ધૂળની ડમરીઓ ઉડી હતી. ગરમીથી પરેશાન લોકો માટે આ ઠંડક રાહત લાવી છે, પરંતુ વાતાવરણના આ અચાનક બદલાવથી જનજીવન પ્રભાવિત થયું છે.