અમદાવાદ : ગુજરાત પોલીસ બેડામાં આજે એક ઐતિહાસિક ફેરફાર થયો છે. વર્ષોથી પોતાની કાર્યદક્ષતા અને ટેકનોલોજીના ઉપયોગથી અમદાવાદને દેશનું સૌથી સુરક્ષિત શહેર બનાવનારા સિનિયર IPS અધિકારી જ્ઞાનેન્દ્રસિંહ મલિક (જી.એસ. મલિક) હવે ગુજરાતના નવા ડાયરેક્ટર જનરલ ઓફ પોલીસ (DGP) તરીકે કાર્યભાર સંભાળશે. એક એવા અધિકારી જેઓ મૂળભૂત રીતે ઇલેક્ટ્રિકલ એન્જિનિયર છે, તેમણે રેલવે અને ONGC જેવી પ્રતિષ્ઠિત સંસ્થાઓની નોકરી છોડીને ખાખી ધારણ કરી અને આજે તેઓ રાજ્યના પોલીસ વડાના સર્વોચ્ચ હોદ્દા પર પહોંચ્યા છે.

એન્જિનિયરિંગથી ખાખી સુધીની અદભુત સફર

હરિયાણાના ફરીદાબાદના વતની એવા મલિકનું વ્યક્તિત્વ બહુમુખી છે. બનારસ હિન્દુ યુનિવર્સિટીમાંથી ઇલેક્ટ્રિકલ એન્જિનિયરિંગ અને ત્યારબાદ એલ.એલ.બી.નો અભ્યાસ કરનાર મલિકના જીવનમાં શિસ્ત અને ટેકનોલોજીનો અનોખો સંગમ છે. પોલીસ સેવામાં જોડાતા પહેલા ONGC બોમ્બે હાઈ અને ભારતીય રેલવેમાં સેવા આપ્યા બાદ જ્યારે તેમણે પોલીસ દળમાં પ્રવેશ કર્યો, ત્યારે તેમણે સાબિત કરી દીધું કે 'ખાખી' અને 'ટેકનોલોજી' જ્યારે એક થાય, ત્યારે ગુનેગારો માટે કોઈ છુપાવવાની જગ્યા રહેતી નથી.

આંતરરાષ્ટ્રીય સ્તરે ભારતનું ગૌરવ

જી.એસ. મલિક માત્ર ભારતના જ નહીં, વૈશ્વિક સ્તરે જાણીતા પોલીસ અધિકારી છે. વર્ષ 2002માં યુગોસ્લાવિયાના કોસોવોમાં સંયુક્ત રાષ્ટ્ર (UN) ના શાંતિ મિશન હેઠળ તેમણે યુદ્ધ ગુનાઓની તપાસ કરી હતી. એટલું જ નહીં, BSFમાં ફરજ બજાવતી વખતે કચ્છના અત્યંત દુર્ગમ 'હરામી નાળા' વિસ્તારમાં ભારતીય સેનાના સહયોગથી જે સાહસિક 'હેલિબોર્ન ઓપરેશન' પાર પાડ્યું હતું, તે આજે પણ સુરક્ષા દળોમાં એક પાઠ્યપુસ્તક સમાન ગણાય છે.

અમદાવાદમાં 'મેગા ઓપરેશન' અને સુરક્ષાની નવી વ્યાખ્યા

પોલીસ કમિશનર તરીકેના તેમના કાર્યકાળમાં ચંડોળા તળાવ આસપાસથી 10,000 થી વધુ ગેરકાયદે મકાનો હટાવીને 4 લાખ ચોરસ મીટર સરકારી જમીન ખુલ્લી કરાવવી એ તેમની સૌથી મોટી સિદ્ધિ ગણાય છે. તેમના જ નેતૃત્વમાં અમદાવાદમાં હજારો સીસીટીવી કેમેરાનું નેટવર્ક સ્થાપિત થયું અને પરિણામ એ આવ્યું કે વર્ષ 2025માં 'નમ્બિઓ' નામની યુરોપિયન સંસ્થાએ અમદાવાદને ભારતનું સૌથી સુરક્ષિત શહેર જાહેર કર્યું.

પારદર્શક ભરતી અને સંવેદનશીલ પોલીસિંગ

મલિકને માત્ર કડક અધિકારી તરીકે જ નહીં, પરંતુ એક સંવેદનશીલ પોલીસ વડા તરીકે પણ ઓળખવામાં આવે છે. પોલીસ કોન્સ્ટેબલ ભરતી બોર્ડના અધ્યક્ષ તરીકે તેમણે 24,000 થી વધુ યુવાનોની અત્યંત પારદર્શક ભરતી કરી હતી. બાળકો માટે પોલીસ સ્ટેશનમાં સમર કેમ્પ યોજવા અને પોલીસ કર્મચારીઓને ફિટ રાખવા માટે 'ફીટ ખાખી' જેવી પહેલ તેમના માનવીય દ્રષ્ટિકોણને દર્શાવે છે.

નવા DGP જી.એસ. મલિકનો આ કાર્યકાળ ગુજરાત માટે એક નવી આશા લઈને આવ્યો છે. હવે જ્યારે તેઓ સમગ્ર રાજ્યની કમાન સંભાળશે, ત્યારે ગુજરાત પોલીસ વધુ ટેક-સેવી અને સુરક્ષિત બને તેવી રાજ્યની જનતાને અપેક્ષા છે.