કલોલ:કલોલ પંથકમાં કૌટુંબિક ઝઘડાએ એક હસતા-રમતા પરિવારની ખુશીઓ છીનવી લીધી હોવાની હૃદયદ્રાવક ઘટના સામે આવી છે. ઘરમાં થયેલી સામાન્ય બોલાચાલી અને દાદી સાસુના અસહ્ય ઠપકાથી ભારે આઘાતમાં સરી પડેલી એક પરિણીતાએ પોતાના બે માસૂમ પુત્રો સાથે નર્મદા કેનાલમાં મોતની છલાંગ લગાવી દીધી હતી. આ કરૂણ ઘટનામાં ૬ વર્ષના એક નિર્દોષ બાળકનું ડૂબી જવાથી કમકમાટીભર્યું મોત નીપજ્યું છે, જ્યારે માતા અને તેના બીજા પુત્રને હેમખેમ બચાવી લેવામાં આવ્યા છે.

મળતી માહિતી મુજબ, કલોલ નજીક આવેલા એક ગામમાં પારિવારિક વિખવાદને કારણે આ સમગ્ર ઘટના ઘટી હતી. ઘરમાં કોઈ બાબતે દાદી સાસુએ પરિણીતાને આકરો ઠપકો આપ્યો હતો. આ મેણા-ટોણા અને ઠપકાથી અત્યંત વ્યથિત અને માનસિક રીતે ભાંગી પડેલી માતાએ અત્યંત આત્યંતિક પગલું ભરવાનો નિર્ણય કર્યો હતો. તે પોતાના બે નાના પુત્રોને સાથે લઈને ઘરની બહાર નીકળી ગઈ હતી અને નજીકમાંથી પસાર થતી નર્મદા કેનાલ પર પહોંચી હતી.

 કોઈ કંઈ સમજે તે પહેલાં જ જીવથી વહાલા બે સંતાનોને પકડીને માતાએ કેનાલના ધસમસતા પ્રવાહમાં ઝંપલાવી દીધું હતું.

પરિણીતાને બાળકો સાથે કેનાલમાં કૂદતી જોઈને આસપાસના લોકો તાત્કાલિક બચાવ કામગીરી માટે દોડી આવ્યા હતા. સ્થાનિક તરવૈયાઓ અને લોકોની ભારે જહેમત બાદ માતા અને એક બાળકને કેનાલમાંથી સહીસલામત બહાર કાઢી લેવામાં આવ્યા હતા. જો કે, વિધાતાના લેખ કંઈક જુદા જ હતા. પાણીના જોરદાર પ્રવાહમાં ફસાયેલા ૬ વર્ષના માસૂમ બાળકને બચાવી શકાયો ન હતો અને ડૂબી જવાથી તેનું કરૂણ મોત નીપજ્યું હતું.

ઘટનાની જાણ થતાં જ સ્થાનીક પોલીસ કાફલો ઘટનાસ્થળે દોડી આવ્યો હતો. પોલીસે મૃતક બાળકના શવને પોસ્ટમોર્ટમ અર્થે હોસ્પિટલ ખસેડ્યો છે અને ગુનો નોંધી આગળની કાયદેસરની કાર્યવાહી હાથ ધરી છે. દાદી સાસુના કડવા વેણના કારણે એક માસૂમ દેવદૂતે દુનિયા છોડવી પડી હોવાની આ ઘટનાથી સમગ્ર પંથકમાં ઘેરા શોકની લાગણી વ્યાપી ગઈ છે અને ચકચાર મચી જવા પામી છે.