નવસારી : દક્ષિણ ગુજરાતના મહત્વના હબ ગણાતા નવસારી શહેર અને જિલ્લાના લાખો રેલવે મુસાફરો માટે ખુશીના મોટા સમાચાર સામે આવ્યા છે. નવસારી ખાતે યોજાયેલા એક ભવ્ય લોકાર્પણ અને 'વિકસિત ભારત સંકલ્પ' સંમેલન દરમિયાન કેન્દ્રિય જળશક્તિ મંત્રી શ્રી સી.આર. પાટીલે નવસારી રેલવે સ્ટેશન પર વધુ એક પ્રીમિયમ 'વંદે ભારત ટ્રેન'ના સ્ટોપેજને મંજૂરી અપાવવાની સત્તાવાર જાહેરાત કરી દીધી છે. લાંબા સમયથી સ્થાનિક દૈનિક મુસાફરો, વેપારીઓ અને ડાયમંડ એસોસિએશન દ્વારા વંદે ભારતના સ્ટોપેજ માટે રજૂઆતો કરવામાં આવી રહી હતી, જેનો હવે સુખદ અંત આવ્યો છે. આ જાહેરાત થતા જ સમગ્ર પંથકમાં ખુશીનો માહોલ છવાઈ ગયો છે.

કેન્દ્રિય મંત્રી સી.આર. પાટીલે કાર્યક્રમમાં જનમેદનીને સંબોધતા જણાવ્યું હતું કે, વડાપ્રધાન શ્રી નરેન્દ્રભાઈ મોદીના નેતૃત્વમાં દેશભરમાં રેલવે ઈન્ફ્રાસ્ટ્રક્ચર અને કનેક્ટિવિટીનો અભૂતપૂર્વ વિકાસ થઈ રહ્યો છે. નવસારીની પ્રગતિમાં રેલવે સુવિધા અત્યંત મહત્વનો ભાગ ભજવે છે. અગાઉ પણ નવસારીને ટ્રેનોના સ્ટોપેજ અપાવવામાં આવ્યા છે અને હવે આ આધુનિક સેમી-હાઈસ્પીડ વંદે ભારત ટ્રેનનું સ્ટોપેજ મળવાથી નવસારીથી મુંબઈ અને અમદાવાદ તરફ અપ-ડાઉન કરતા હજારો મુસાફરોનો કિંમતી સમય બચશે. આ સ્ટોપેજ માત્ર મુસાફરી સરળ નહીં બનાવે, પરંતુ નવસારીના વેપાર, ઉદ્યોગ અને પ્રવાસનને પણ નવી પાંખો આપશે.

નવસારી ખાતે યોજાયેલી આ બેઠકમાં મંત્રીશ્રીએ વિવિધ લોકહિતના પ્રકલ્પોના લોકાર્પણ અને ખાતમુહૂર્ત પણ કર્યા હતા. તેમણે ઉમેર્યું કે, કેન્દ્ર અને રાજ્યની ડબલ એન્જિન સરકાર છેવાડાના માનવી સુધી સુવિધાઓ પહોંચાડવા કટિબદ્ધ છે. રોડ-રસ્તા, પાણીની સુવિધાથી લઈને રેલવે અને ડિજિટલ કનેક્ટિવિટીના કારણે દક્ષિણ ગુજરાત આજે વિકાસનું મોડેલ બન્યું છે. વર્ષ ૨૦૪૭ સુધીમાં ભારતને વિકસિત અને આત્મનિર્ભર બનાવવાની નેમ સાથે સરકારી યોજનાઓ સો ટકા લાભાર્થીઓ સુધી પહોંચાડવા તંત્ર યુદ્ધના ધોરણે કામ કરી રહ્યું છે.

સૂત્રોના જણાવ્યા અનુસાર, કેન્દ્રિય મંત્રી સી.આર. પાટીલની આ જાહેરાત બાદ રેલવે બોર્ડ દ્વારા નવસારી સ્ટેશન પર વંદે ભારત ટ્રેનના આગમન, પ્રસ્થાન અને સ્ટોપેજના સમય અંગેનું સત્તાવાર નોટિફિકેશન અને ટાઈમ-ટેબલ આગામી થોડા જ દિવસોમાં જાહેર કરી દેવામાં આવશે. મુસાફરોને આંતરરાષ્ટ્રીય સ્તરની સુવિધા ઘરઆંગણે મળવા જઈ રહી હોવાથી સ્થાનિક આગેવાનો અને સંગઠનો દ્વારા કેન્દ્રિય મંત્રીશ્રીનો આભાર માનવામાં આવ્યો હતો.