અમદાવાદ તા.૧૫ : મેડિકલ પ્રવેશની સૌથી મોટી પરીક્ષા NEET UG ને લઈને દર વર્ષે સક્રિય થતી ઠગ ગેંગો સામે અમદાવાદ સાયબર ક્રાઈમ પોલીસે મોટી કાર્યવાહી કરી છે. NEETના પેપર લીક થઈ ગયા હોવાની ખોટી અને ભય ફેલાવતી અફવા ફેલાવીને આરોપીઓએ ગુજરાત સહિત દેશભરના વાલીઓ પાસેથી કુલ 1.5 કરોડ રૂપિયાથી વધુની ઠગાઈ આચરી હતી.

સાયબર ક્રાઈમની પ્રાથમિક તપાસમાં ખુલ્યું કે આ ગેંગના સભ્યો રાજસ્થાનમાં બેસીને NEET આપનારા વિદ્યાર્થીઓના ડેટા મેળવતા હતા. ત્યારબાદ વાલીઓને ફોન કરીને કહેતા કે "અમારી પાસે NEETનું ઓરિજિનલ પેપર આવી ગયું છે. જો તમે 10-15 લાખ રૂપિયા આપો તો તમારા દીકરા/દીકરીને ટોપ રેન્ક સાથે પાસ કરાવી આપીશું". ડર અને લાલચ વચ્ચે ફસાયેલા અનેક વાલીઓએ આરોપીઓના કહેવાથી અલગ-અલગ બેંક ખાતામાં રકમ ટ્રાન્સફર કરી દીધી હતી.

અમદાવાદના એક વાલીએ છેતરપિંડી અંગે સાયબર ક્રાઈમમાં ફરિયાદ નોંધાવતા જ પોલીસ એક્શનમાં આવી ગઈ. DCP સાયબર ક્રાઈમની દેખરેખ હેઠળ ટેકનિકલ સર્વેલન્સ, કોલ ડિટેઈલ રેકોર્ડ અને બેંક ટ્રાન્ઝેક્શનના આધારે આખા નેટવર્કને ટ્રેસ કરવામાં આવ્યું. તપાસનો તાર રાજસ્થાન સુધી પહોંચતા જ પોલીસની ટીમ ત્યાં દોડી ગઈ અને ગેંગના 2 મુખ્ય સૂત્રધારોને ઝડપી પાડ્યા. પકડાયેલા આરોપીઓ પાસેથી મોબાઈલ, સિમ કાર્ડ અને બેંક પાસબુક સહિતનો મુદ્દામાલ જપ્ત કરવામાં આવ્યો છે.

સાયબર ક્રાઈમ પોલીસે સ્પષ્ટતા કરી છે કે NEET, JEE જેવી NTA દ્વારા લેવાતી રાષ્ટ્રીય પરીક્ષાઓના પેપર લીક થવાની વાતો 99% અફવા જ હોય છે. NTAની સુરક્ષા વ્યવસ્થા અત્યંત કડક હોય છે. આરોપીઓ માત્ર વાલીઓના ડરનો ફાયદો ઉઠાવે છે. પોલીસે તમામ વાલીઓને અપીલ કરી છે કે કોઈપણ અજાણ્યા નંબર પરથી "પેપર લીક"ની વાત આવે તો તરત ફોન કટ કરી દો, કોઈને પણ પૈસા ટ્રાન્સફર ન કરો અને તરત 1930 સાયબર હેલ્પલાઇન અથવા http://cybercrime.gov.in પર ફરિયાદ નોંધાવો. હાલ પોલીસ આ ગેંગ સાથે સંકળાયેલા અન્ય સભ્યો અને જેમના ખાતામાં પૈસા ગયા છે તે મ્યૂલ એકાઉન્ટ ધારકોને શોધી રહી છે.