ગાંધીનગર: ડિફેન્સ ક્ષેત્રમાં ટેસ્ટિંગ, સર્ટિફિકેશન અને આધુનિક ઇન્ફ્રાસ્ટ્રક્ચર વિકાસને વધુ મજબૂત બનાવવા માટે ગાંધીનગર ખાતે “ડિફેન્સ ટેસ્ટિંગ, સર્ટિફિકેશન અને ઈન્ફ્રાસ્ટ્રક્ચર ડેવલોપમેન્ટ” વિષય પર એક મહત્વપૂર્ણ વર્કશોપનું સફળ આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ ડિફેન્સ ક્ષેત્રમાં ઉદ્યોગો, સંશોધન સંસ્થાઓ, શૈક્ષણિક સંસ્થાઓ અને સરકારી તંત્ર વચ્ચે સહયોગ વધારવાનો હતો.
    આ કાર્યક્રમનું આયોજન EQDC ટ્રેઇનિંગ હોલ, ગાંધીનગર ખાતે કરવામાં આવ્યું હતું, જેમાં MSMEs, વિદ્યાર્થીઓ, ઉદ્યોગસાહસિકો, શિક્ષણવિદો અને વૈજ્ઞાનિકો સહિતના વિવિધ ક્ષેત્રના પ્રતિનિધિઓએ ભાગ લીધો હતો. કાર્યક્રમ દરમિયાન ડિફેન્સ ટેકનોલોજી, ટેસ્ટિંગ સુવિધાઓ, સર્ટિફિકેશન ઇકોસિસ્ટમ અને પ્રધાનમંત્રી નરેન્દ્રભાઈ મોદીના 'આત્મનિર્ભર ભારત' ના વિઝન સાથે જોડાયેલા મહત્વપૂર્ણ મુદ્દાઓ પર ચર્ચા કરવામાં આવી હતી.
કાર્યક્રમમાં iNDEXTb ના મેનેજિંગ ડિરેક્ટર કે. સી. સંપત (IAS) મુખ્ય વક્તા તરીકે ઉપસ્થિત રહ્યા હતા.આ ઉપરાંત, અવકાશ વૈજ્ઞાનિક અને સ્પેસ એપ્લિકેશન સેન્ટર (SAC), ISRO ના ભૂતપૂર્વ ડિરેક્ટર ડૉ. એન. એમ. દેસાઈ, સ્ટ્રેટેજિક બિઝનેસ કન્સલટન્ટ અને  ભારતીય સેનાના ભૂતપૂર્વ સિનિયર પ્રોજેક્ટ મેનેજમેન્ટ ઓફિસર કર્નલ તરુણ કુમાર (નિવૃત્ત), CTO, IIT ગાંધીનગરના કોમોડોર મનીષ ત્રિપાઠી (નિવૃત્ત) અને  આર.આર.યુ. ના પ્રો. વાઇસ-ચાન્સેલર  કલ્પેશ એચ. વાંદ્રા સહિતના નિષ્ણાતોએ પોતાના વિચારો રજૂ કર્યા હતા.
આ કાર્યક્રમ દરમિયાન કે. સી. સંપત (IAS) એ પોતાના વિચારો રજૂ કરતા જણાવ્યું કે, “ડિફેન્સ ક્ષેત્રમાં આત્મનિર્ભરતા હાંસલ કરવા માટે મજબૂત ટેસ્ટિંગ અને સર્ટિફિકેશન ઇકોસિસ્ટમ ખૂબ જ જરૂરી છે. સંસ્થાઓ અને ઉદ્યોગો વચ્ચેનો સહયોગ નવીનતા અને વિકાસ માટે મહત્વપૂર્ણ ભૂમિકા ભજવશે." સ્ટાર્ટઅપ્સ અને ઇનોવેટર્સ દ્વારા સ્થાનિક સંશોધન અને વિકાસના મહત્વ પર ભાર મૂકતા, તેમણે ઉમેર્યું કે આવી મજબૂત સ્થાનિક સિસ્ટમો ભારતની આયાત નિર્ભરતા ઘટાડવા માટે મહત્વપૂર્ણ છે.
વધુમાં જણાવ્યું કે, નીતિ, કૌશલ્ય, માળખાગત સુવિધાઓ, નવીનતા અને ઉદ્યોગ ભાગીદારીને એક સંકલિત રીતે એકસાથે લાવીને ભવિષ્ય માટે તૈયાર સંરક્ષણ ઇકોસિસ્ટમ બનાવવાના મહત્વ પર ભાર મૂક્યો. મુખ્ય સ્તંભો જેમ કે માળખાગત સુવિધાઓ, નવીનતા અને સ્ટાર્ટઅપ્સ, નિકાસ અને વૈશ્વિક ભાગીદારી, સંશોધન-થી-ઉત્પાદન જોડાણોને મજબૂત બનાવવા પર ધ્યાન કેન્દ્રિત કરવામાં આવ્યું છે, જે વ્યાપક ઇકોસિસ્ટમ વિકાસને સુનિશ્ચિત કરે છે.
જયારે અવકાશ વૈજ્ઞાનિક ડૉ. એન. એમ. દેસાઈ એ જણાવ્યું કે, “વિજ્ઞાન, ટેકનોલોજી અને સંશોધનના સંકલન દ્વારા જ આપણે ભવિષ્યના પડકારો માટે સક્ષમ ડિફેન્સ સિસ્ટમ વિકસાવી શકીશું.”
બીજી તરફ કર્નલ તરુણ કુમારે જણાવ્યું કે, “આધુનિક ડિફેન્સ માટે માત્ર ટેકનોલોજી પૂરતી નથી, પરંતુ તેને ચકાસવા, પ્રમાણિત કરવા અને અસરકારક રીતે અમલમાં મૂકવા માટે મજબૂત માળખાની જરૂર છે.” જ્યારે, કોમોડોર મનીષ ત્રિપાઠીએ એમના પ્રેઝન્ટેશન દરમિયાન જણાવ્યું કે, “ઉદ્યોગો, શૈક્ષણિક સંસ્થાઓ અને સંશોધન ક્ષેત્ર વચ્ચેનો સહયોગ ભારતને ડિફેન્સ ઇનોવેશનના ક્ષેત્રમાં નવી ઊંચાઈઓ સુધી લઈ જઈ શકે છે.”
આ વર્કશોપ જ્ઞાનના વિનિમય અને સહયોગને પ્રોત્સાહન આપતું એક મહત્વપૂર્ણ મંચ સાબિત થયું, જેમાં સંરક્ષણ ટેકનોલોજી, સ્વદેશી વિકાસ અને વ્યૂહાત્મક ભાગીદારીના ભવિષ્યમાં રહેલી નવી તકો અંગે અર્થપૂર્ણ ચર્ચાઓ થઈ. લાંબા ગાળાના વિકાસને ગતિ આપવા માટે સંરક્ષણ સંશોધન અને વિકાસ સંગઠન (DRDO), સંરક્ષણ જાહેર ક્ષેત્રના ઉપક્રમો, શૈક્ષણિક સંસ્થાઓ, ઉદ્યોગો અને સ્ટાર્ટઅપ્સ વચ્ચે વધુ મજબૂત અને અસરકારક સહયોગ કેવી રીતે સ્થાપિત કરી શકાય તે મુદ્દે વિશેષ ધ્યાન કેન્દ્રિત કરવામાં આવ્યું. સાથે જ, શ્રેષ્ઠતા કેન્દ્રો (Centres of Excellence) અને મજબૂત સંસ્થાકીય માળખાં વિકસાવીને સંરક્ષણ ક્ષેત્રમાં ટકાઉ વૃદ્ધિ સુનિશ્ચિત કરવા અંગે પણ ચર્ચા થઈ.
આ સમગ્ર પહેલનો વ્યાપક ઉદ્દેશ્ય અલગ-અલગ સ્તરે થઈ રહેલા પ્રયાસોને એક સંકલિત અને વિસ્તૃત ઇકોસિસ્ટમમાં રૂપાંતરિત કરવાનો છે, જ્યાં કૌશલ્ય વિકાસ, સંશોધન, ઉત્પાદન ક્ષમતા અને બજાર વચ્ચે સઘન તાલમેલ સ્થાપિત થાય અને દરેક હિતધારક એક જ દિશામાં આગળ વધે.
સાચા અર્થમાં આત્મનિર્ભરતા હાંસલ કરવા માટે એવી મજબૂત અને સ્વદેશી "વિશ્વાસ પ્રણાલીઓ"નું નિર્માણ અનિવાર્ય છે, જેને માન્યતા પ્રાપ્ત પ્રયોગશાળાઓ, પ્રમાણિત સંસ્થાઓ અને અસાધારણ કુશળ સ્થાનિક પ્રતિભાનું સશક્ત સમર્થન પ્રાપ્ત હોય. ગુજરાત સરકારના ઉદ્યોગ અને ખાણ વિભાગ હેઠળ કાર્યરત સ્વાયત્ત સંસ્થા તરીકે EQDC આ રાષ્ટ્રીય મિશનને આગળ વધારવા માટે એક સ્વાભાવિક અને વિશ્વસનીય કેન્દ્ર તરીકે ઉભરી આવ્યું છે. સંસ્થાના પ્રતિષ્ઠિત ગ્રાહકોમાં ISROનું સ્પેસ એપ્લિકેશન સેન્ટર (SAC), ભારતીય વાયુસેના તથા ઓઇલ એન્ડ નેચરલ ગેસ કોર્પોરેશન (ONGC) જેવી અગ્રણી સંસ્થાઓનો સમાવેશ થાય છે, જે તેની ગુણવત્તા, વિશ્વસનીયતા અને ક્ષમતાનો પુરાવો આપે છે