અમદાવાદ :ગુજરાતમાં ચોમાસાની વચ્ચે હવામાન નિષ્ણાત અંબાલાલ પટેલે વરસાદને લઈને નવી આગાહી વ્યક્ત કરી છે. તેમના જણાવ્યા મુજબ ત્રણ દિવસ બાદ વરસાદી માહોલ જામશે.  5 ઓગસ્ટ બાદ રાજ્યમાં વાદળછાયું વાતાવરણ, પવનની ગતિમાં વધારો અને 8થી 15 ઓગસ્ટ દરમિયાન અનેક વિસ્તારોમાં સારા વરસાદની શક્યતા છે. ખાસ કરીને દક્ષિણ ગુજરાતમાં ભારે વરસાદ પડી શકે છે, જ્યારે સપ્ટેમ્બર મહિનામાં પણ વરસાદી માહોલ યથાવત રહેવાની સંભાવના વ્યક્ત કરવામાં આવી છે.

અંબાલાલ પટેલના જણાવ્યા અનુસાર 5 ઓગસ્ટ બાદ ગુજરાતમાં વાદળછાયું વાતાવરણ રહેવાની શક્યતા છે. તેની સાથે પવનની ગતિમાં પણ વધારો થઈ શકે છે, જેના કારણે રાજ્યના અનેક વિસ્તારોમાં વરસાદી માહોલ વધુ સક્રિય બનવાની સંભાવના છે. આગાહી મુજબ 8થી 15 ઓગસ્ટ દરમિયાન ગુજરાતના અનેક જિલ્લાઓમાં સારો વરસાદ નોંધાઈ શકે છે. ખાસ કરીને દક્ષિણ ગુજરાતના વિસ્તારોમાં ભારે વરસાદની શક્યતા વ્યક્ત કરવામાં આવી છે. ખેડૂતો અને નાગરિકોને હવામાનની સ્થિતિ પર સતત નજર રાખવાની સલાહ આપવામાં આવી છે.

અંબાલાલ પટેલે જણાવ્યું છે કે ઉપરવાસમાં સારો વરસાદ નોંધાશે તો તાપી નદીમાં પાણીની આવક વધી શકે છે. જેના કારણે નદીના જળસ્તરમાં વધારો થવાની શક્યતા છે. નીચાણવાળા વિસ્તારોમાં રહેતા લોકોને સતર્ક રહેવાની જરૂર હોવાનું પણ તેમણે જણાવ્યું છે.

અંબાલાલ પટેલના જણાવ્યા પ્રમાણે ઓગસ્ટ બાદ સપ્ટેમ્બર મહિનામાં પણ વરસાદી પ્રવૃત્તિ ચાલુ રહી શકે છે. ગણેશ ચતુર્થી દરમિયાન પણ વરસાદની સંભાવના વ્યક્ત કરવામાં આવી છે. ઉપરાંત 12 સપ્ટેમ્બર બાદ ફરી એક વખત નવી વરસાદી સિસ્ટમ સક્રિય થઈ શકે છે. ઓગસ્ટ અને સપ્ટેમ્બર બંને મહિનામાં પવનની ગતિ વધુ રહેવાની સાથે વરસાદી માહોલ યથાવત રહેવાની શક્યતા હોવાનું તેમણે જણાવ્યું છે.