અમદાવાદ : સપના લઈને ઘરથી નીકળેલી એક દીકરી અમદાવાદમાં ભણવા આવી હતી. આશરો લીધો PGનો. પણ જ્યાં સુરક્ષિત રહેવાની અપેક્ષા હતી, ત્યાં જ તેની સાથે દુષ્કર્મની ઘટના બની. આ ઘટનાએ સમગ્ર રાજ્યને હચમચાવી દીધું છે.

સુરતની એક યુવતી ઉચ્ચ અભ્યાસ માટે અમદાવાદના એક PGમાં રહેતી હતી. આરોપ છે કે PG સાથે સંકળાયેલ વ્યક્તિએ તેની લાચારીનો લાભ લઈને તેની સાથે દુષ્કર્મ આચર્યું. યુવતીએ પહેલા તો ડરના કારણે કોઈને વાત ન કરી. પરંતુ બાદમાં પરિવારને વિશ્વાસમાં લઈને તેણે અમદાવાદ પોલીસમાં ફરિયાદ નોંધાવી. 

પોલીસે ફરિયાદના આધારે તાત્કાલિક કાર્યવાહી કરી આરોપીને ઝડપી પાડ્યો છે. તેની વિરુદ્ધ બળાત્કાર સહિતની ગંભીર કલમો હેઠળ ગુનો નોંધવામાં આવ્યો છે. પોલીસ હવે PGની આસપાસના CCTV, આરોપીનું બેકગ્રાઉન્ડ અને PGનું રજીસ્ટ્રેશન છે કે કેમ તેની પણ તપાસ કરી રહી છે.

આ બનાવના પડઘા માત્ર અમદાવાદ પૂરતા સીમિત ન રહ્યા. સુરતમાં ભણતી અને PG-હોસ્ટેલમાં રહેતી સેંકડો યુવતીઓ રસ્તા પર ઉતરી આવી. તેમના હાથમાં તક્તીઓ હતી અને મોઢે એક જ સૂત્ર હતું - "અમને સલામત ભવિષ્ય આપો". 

પ્રદર્શનકારી યુવતીઓએ કહ્યું કે "અમે માતા-પિતાનું સપનું લઈને મોટા શહેરમાં આવીએ છીએ. PGમાં CCTV નથી, સિક્યોરિટી નથી, વેરિફિકેશન નથી. આવતીકાલે અમારી સાથે પણ આવું થઈ શકે છે. સરકારે હવે આંખો ખોલવી પડશે."

મહિલા સંગઠનોએ પણ આ ઘટનાની સખત શબ્દોમાં નિંદા કરી છે. તેમની માંગ છે કે રાજ્યના દરેક PG અને હોસ્ટેલનું ફરજિયાત રજીસ્ટ્રેશન કરવામાં આવે. દરેક જગ્યાએ CCTV, મહિલા ચોકીદાર અને પોલીસ વેરિફિકેશન ફરજિયાત બનાવવામાં આવે.

આરોગ્ય મંત્રી અને ગૃહ વિભાગે પણ આ મામલે ગંભીર નોંધ લીધી છે. અધિકારીઓએ કહ્યું કે દોષિતોને કડકમાં કડક સજા કરવામાં આવશે અને સમગ્ર રાજ્યમાં PGની ઓડિટ હાથ ધરવામાં આવશે.

આ એક ઘટના નથી. આ હજારો માતા-પિતાનો વિશ્વાસ અને દીકરીઓના સપનાનો સવાલ છે.