અમદાવાદ : ભાઈ-બહેનના પવિત્ર પ્રેમ અને સ્નેહના પ્રતીક સમાન રક્ષાબંધનના તહેવારને હવે ગણતરીના દિવસો બાકી રહ્યા છે, ત્યારે સમગ્ર અમદાવાદ શહેરમાં પર્વની ઉજવણીને લઈને ભારે ઉત્સાહ અને રોનક જોવા મળી રહી છે. બહેનો પોતાના ભાઈ માટે શ્રેષ્ઠ અને અનોખી રાખડી પસંદ કરી શકે તે માટે શહેરના મુખ્ય બજારોમાં નવતર ડિઝાઈનની રાખડીઓનું આગમન થઈ ચૂક્યું છે. સામાન્ય રેશમી દોરાની રાખડીઓની સાથે સાથે આ વર્ષે સોનીની દુકાનો તેમજ જ્વેલરી શો-રૂમ્સમાં મુકાયેલી ચાંદીની રાખડીઓ ખરીદદારો માટે વિશેષ આકર્ષણનું કેન્દ્ર બની છે.

ચાંદીની રાખડીઓની શ્રેણીમાં આ વખતે પરંપરાગત અને આધુનિક ડિઝાઇન્સનું સુંદર મિશ્રણ જોવા મળી રહ્યું છે. ખાસ કરીને રુદ્રાક્ષ જડિત ચાંદીની રાખડીઓ, 'ઓમ' અને 'સ્વાસ્તિક' જેવા ધાર્મિક પ્રતીકો ધરાવતી રાખડીઓ ધર્મપ્રેમી ભક્તોમાં ખૂબ લોકપ્રિય થઈ રહી છે. આ ઉપરાંત, નાના બાળકો માટે તેમની પસંદગીના કાર્ટૂન કેરેક્ટર્સવાળી ક્યુટ ચાંદીની રાખડીઓ પણ બજારમાં ધૂમ મચાવી રહી છે.

તહેવારની ઉજવણી માત્ર ભાઈ-બહેન પૂરતી મર્યાદિત ન રાખતા, પરિવારના સંબંધોને વધુ ગાઢ બનાવવા માટે બજારમાં ભાભી માટેની ખાસ 'લુમ્બા' ટાઇપ ચાંદીની રાખડીઓ પણ મોટી સંખ્યામાં ઉપલબ્ધ કરાવવામાં આવી છે. બજારમાં ઉપલબ્ધ ચાંદીની રાખડીઓની કિંમત તેના વજન અને ઝીણવટભરી ડિઝાઈન મુજબ આશરે રૂ. ૧૦૦ થી શરૂ થઈને રૂ. ૩,૫૦૦ સુધીની જોવા મળે છે. ગ્રાહકો હવે માત્ર એક દિવસ પૂરતો ઉપયોગ કરવાને બદલે ચાંદીની રાખડી પસંદ કરી રહ્યા છે, જેથી તેને ભવિષ્યમાં પણ બ્રેસલેટ કે યાદગાર કડા તરીકે લાંબા સમય સુધી સાચવી શકાય.