સુરત : સુરત શહેરના કાપોદ્રા વિસ્તારમાં આવેલી પોલીસ ચોકીની અંદર શનિવારે એક અત્યંત ચોંકાવનારી અને ગંભીર ઘટના સામે આવી છે. કાપોદ્રા પોલીસ સ્ટેશનના ફરજ પરના પીએસઆઈ (PSI) દ્વારા પોતાની સર્વિસ રિવોલ્વર સાફ કરવામાં આવી રહી હતી તે દરમિયાન અચાનક મિસ ફાયરિંગ થતાં રિવોલ્વરમાંથી ગોળી છૂટી ગઈ હતી. આ ગોળી નજીકમાં જ ઊભેલા અરવિંદ પટેલ નામના નિર્દોષ યુવકના પેટના ડાબા ભાગે વાગતાં ચોકીમાં ભારે અફરાતફરી મચી ગઈ હતી.

ગોળી વાગતાં જ યુવક ઢળી પડ્યો હતો, જેના પગલે પોલીસ કર્મચારીઓએ ત્વરિત કાર્યવાહી કરીને ઇજાગ્રસ્ત અરવિંદ પટેલને સારવાર અર્થે કતારગામ સ્થિત કિરણ હોસ્પિટલ ખાતે ખસેડ્યો હતો. હોસ્પિટલમાં તબીબોની વિશેષ ટીમ દ્વારા તાત્કાલિક યુવકનું ઓપરેશન કરીને પેટમાંથી ગોળી બહાર કાઢવામાં આવી હતી. તબીબો અને ઉચ્ચ પોલીસ અધિકારીઓના જણાવ્યા અનુસાર, હાલ સર્જરી બાદ યુવકની તબિયતમાં સુધારો જોવા મળી રહ્યો છે અને તેની સ્થિતિ ખતરાથી બહાર છે.

આ ઘટનાની જાણ થતાં જ સુરત પોલીસના ઉચ્ચ અધિકારીઓનો કાફલો ઘટનાસ્થળે અને ત્યારબાદ કિરણ હોસ્પિટલ ખાતે દોડી ગયો હતો. અધિકારીઓએ ઇજાગ્રસ્ત યુવકની સ્થિતિ અંગે તબીબો સાથે વિગતવાર ચર્ચા કરી હતી અને પરિવારજનોને સાંત્વના આપી હતી. પોલીસ ચોકી જેવા સુરક્ષિત સ્થળે સર્વિસ રિવોલ્વરમાંથી અચાનક મિસ ફાયરિંગની ઘટના બનતાં પોલીસ બેડામાં ભારે ચર્ચા જાગી છે. આ મામલે ઉચ્ચ અધિકારીઓએ બેદરકારી અંગે તપાસના આદેશ આપી આગળની કાર્યવાહી હાથ ધરી છે.