બનાસકાંઠા : બનાસકાંઠા જિલ્લાના વડગામ તાલુકાના જલોત્રા ગામેથી એક અત્યંત કાળજું કંપાવી દેનારી અને હૃદયદ્રાવક ઘટના સામે આવી છે. જલોત્રા ગામમાં એક જ દિવસની અંદર બે સગા ભાઈઓના અચાનક હાર્ટ એટેક આવવાના કારણે કરૂણ મોત નીપજતાં સમગ્ર પરિવાર પર દુઃખનો પહાડ તૂટી પડ્યો છે. એક જ પરિવારના બે કમાતા અને આધારસ્તંભ સમાન ભાઈઓના એકસાથે મોતના સમાચારથી જલોત્રા ગામ સહિત સમગ્ર પંથકમાં અરેરાટી સાથે ભારે શોકની લાગણી ફરી વળી છે.

મળતી માહિતી અનુસાર, મૃતકોમાં ધીરુભાઈ ચૌધરી (ઉંમર વર્ષ ૫૯) અને તેમના નાના ભાઈ મહેશભાઈ ચૌધરી (ઉંમર વર્ષ ૫૬)નો સમાવેશ થાય છે. શનિવારે અચાનક જ બંને ભાઈઓની તબિયત એકપછી એક લથડવા લાગી હતી. પરિવારજનો દ્વારા બંનેને તાત્કાલિક હોસ્પિટલ ખાતે સારવાર અર્થે ખસેડવામાં આવ્યા હતા. જોકે, હોસ્પિટલમાં સારવાર દરમિયાન બંને ભાઈઓની સ્થિતિ વધુ ગંભીર બની હતી અને તબીબોના તમામ પ્રયાસો છતાં હાર્ટ એટેકના કારણે બંનેએ અંતિમ શ્વાસ લીધા હતા.

એક જ દિવસે અને ટૂંક સમયના અંતરાલમાં જ બે સગા ભાઈઓના અકાળે અવસાન થતાં ચૌધરી પરિવાર પર આભ ફાટી પડ્યું છે. આ કરૂણ હોનારતને પગલે ગ્રામજનો અને સ્નેહીજનો મોટી સંખ્યામાં સાંત્વના આપવા પરિવારજનો પાસે દોડી આવ્યા હતા. આ ઘટનાએ ફરી એકવાર નાની ઉંમરે કે અચાનક આવતા હાર્ટ એટેકના વધતા જતા બનાવો અંગે લોકોમાં ગંભીર ચિંતા જગાવી દીધી છે.