સુરતના ઓલપાડ વિસ્તારમાં નિર્માણધીન મકાન પર સેન્ટિંગનું કામ કરી રહેલા એક નિર્દોષ શ્રમિકનું ગંભીર અકસ્માતમાં કરુણ મોત નીપજ્યું છે. સુરક્ષાના સાધનોના અભાવે ઊંચાઈ પરથી નીચે પટકાતા યુવકે ઘટનાસ્થળે જ દમ તોડ્યો હતો, જેને પગલે પરિવાર પર આભ ફાટી પડ્યું છે.

મૃતકની ઓળખ 35 વર્ષીય મુન્ના વર્મા તરીકે થઈ છે, જે મૂળ બિહારના વતની હતા અને લાંબા સમયથી પરિવાર સાથે ઓલપાડમાં રહીને ગુજરાન ચલાવતા હતા. પરિવારજનોના આક્ષેપ મુજબ, બાંધકામ સાઈટ પર કોન્ટ્રાક્ટર દ્વારા કોઈ પણ પ્રકારની સુરક્ષા વ્યવસ્થા કરવામાં આવી નહોતી. સેન્ટિંગનું કામ કરતી વખતે પૂરતી સાવચેતી ન રાખતા આ નિર્દોષ યુવકનો ભોગ લેવાયો છે.

અકસ્માત બાદ તરત જ મુન્ના વર્માને ગંભીર હાલતમાં સુરતની સિવિલ હોસ્પિટલ ખાતે ખસેડવામાં આવ્યા હતા. જોકે, ફરજ પરના ડોક્ટરોએ તપાસીને તેમને મૃત જાહેર કર્યા હતા. હોસ્પિટલ પહોંચતા પહેલા જ તેમનો શ્વાસ થંભી ગયો હતો. આ બનાવથી સમગ્ર વિસ્તારમાં શોકનું મોજું ફરી વળ્યું છે.

મૃતક મુન્ના વર્મા તેમના પરિવારના એકમાત્ર કમાનાર સભ્ય હતા. તેમના અવસાનથી પત્ની અને બાળકો પર આર્થિક મુશ્કેલીઓનો પહાડ તૂટી પડ્યો છે. પરિવારજનો અને સ્થાનિકોએ કોન્ટ્રાક્ટરની બેદરકારી સામે કડક કાર્યવાહી કરવાની અને શોકગ્રસ્ત પરિવારને તાત્કાલિક યોગ્ય વળતર ચૂકવવાની સરકાર પાસે માંગ કરી છે. પોલીસ દ્વારા આ સમગ્ર મામલે તપાસ હાથ ધરવામાં આવી છે.