સુરત : દક્ષિણ ગુજરાતમાં મેઘરાજાની મહેર અને ઉપરવાસમાં પડી રહેલા ભારે વરસાદને પગલે સુરતની જીવાદોરી સમાન તાપી નદીમાં નવા નીર આવ્યા છે. તાપી નદીના જળસ્તરમાં થયેલા વધારાને કારણે સુરતનો સુપ્રસિદ્ધ વિયર-કમ-કોઝવે ઓવરફ્લો થયો છે. કોઝવે પરથી પાણી વહેતા થતાં મનમોહક અને નયનરમ્ય દ્રશ્યો સર્જાયા છે, પરંતુ સાવચેતીના ભાગરૂપે વહીવટી તંત્ર દ્વારા આ માર્ગને વાહનવ્યવહાર માટે બંધ કરી દેવામાં આવ્યો છે.
ભયજનક સપાટીને વટાવી કોઝવે ઓવરફ્લો
સુરતના રાંદેર અને સિંગણપોર વિસ્તારને જોડતા આ કોઝવેની ભયજનક સપાટી 6 મીટર નક્કી કરવામાં આવી છે. આજે બપોરે 12 વાગ્યાના સુમારે કોઝવેની સપાટી 6.84 મીટર નોંધાતા તે ઓવરફ્લો થયો હતો. કોઝવે પરથી પાણીનો પ્રવાહ વહેતો થતા વહીવટી તંત્ર એલર્ટ મોડમાં આવી ગયું છે. નદીના પાણીમાં વધારો થતાં સુરક્ષાને ધ્યાનમાં રાખીને તંત્ર દ્વારા તાત્કાલિક અસરથી કોઝવે પર અવરજવર બંધ કરી દેવામાં આવી છે.
વાહનચાલકો માટે વૈકલ્પિક રૂટ
ઉલ્લેખનીય છે કે, આ કોઝવે સુરતના બે મુખ્ય વિસ્તારો એટલે કે રાંદેર અને કતારગામ-વેડરોડને જોડતો સૌથી ટૂંકો અને વ્યસ્ત માર્ગ છે. રોજિંદા હજારો વાહનચાલકો આ માર્ગનો ઉપયોગ કરે છે. કોઝવે બંધ થવાથી હવે વાહનચાલકોને ભારે હાલાકી ન ભોગવવી પડે તે માટે તંત્રએ વૈકલ્પિક માર્ગો જાહેર કર્યા છે. હવે વાહનચાલકોએ પોતાના ગંતવ્ય સ્થાને પહોંચવા માટે ચંદ્રશેખર આઝાદ બ્રિજ અને ડભોલી-જહાંગીરપુરા બ્રિજ પરથી અવરજવર કરવાની રહેશે.
તંત્રની કડક સૂચના: સેલ્ફી લેવાથી બચો
કોઝવેના નયનરમ્ય દ્રશ્યો નિહાળવા અને સેલ્ફી લેવા માટે મોટી સંખ્યામાં લોકો ઉમટી રહ્યા છે, જે જોખમી સાબિત થઈ શકે છે. વહીવટી તંત્ર દ્વારા નાગરિકોને નદી કિનારાથી દૂર રહેવા અને કોઝવે નજીક ન જવાની ખાસ અપીલ કરવામાં આવી છે. કોઈપણ અનિચ્છનીય ઘટનાને ટાળવા માટે કોઝવે ખાતે ચુસ્ત પોલીસ બંદોબસ્ત ગોઠવી દેવામાં આવ્યો છે.
ગત વર્ષની સ્થિતિ
નોંધનીય છે કે ગત વર્ષે ચોમાસા દરમિયાન કોઝવે કુલ 146 દિવસ સુધી બંધ રાખવાની ફરજ પડી હતી. જોકે, આ વર્ષે વરસાદનું આગમન મોડું થતા ગત 3 જુલાઈથી કોઝવે બંધ કરવામાં આવ્યો છે. હાલમાં તંત્ર દ્વારા તાપી નદીના જળસ્તર પર સતત નજર રાખવામાં આવી રહી છે.