નવસારી જિલ્લાના ચીખલીના મજીગામમાં આવેલા સરકારી વાયરલેસ સ્ટેશનની આશરે 25 એકર જેટલી વિશાળ જમીનમાં આજે ભીષણ આગ ફાટી નીકળતા ચકચાર મચી ગઈ હતી. સ્થાનિક લોકોનો દાવો છે કે, આ સરકારી જમીનમાં ઘાસની સફાઈ કરવા માટે કોઈ શોર્ટકટ અપનાવીને સફાઈ કરનારા તત્વો દ્વારા જ જાણીજોઈને આગ ચાંપવામાં આવી રહી છે. છેલ્લા 4 થી 5 વર્ષથી આ પ્રકારનો સિલસિલો સતત ચાલતો હોવાથી, વારંવાર લાગતી આગને કારણે આસપાસના અનેક મૂલ્યવાન વૃક્ષો બળીને ખાખ થઈ રહ્યા છે અને પર્યાવરણને પણ ભારે નુકસાન પહોંચી રહ્યું છે. આજે લાગેલી આ વિકરાળ આગને કાબૂમાં લેવા માટે બિલીમોરા અને ખૂંધ ફાયર બ્રિગેડની ટીમોને તાત્કાલિક ઘટનાસ્થળે દોડવું પડ્યું હતું અને ભારે જહેમત બાદ આગ પર કાબૂ મેળવ્યો હતો. ું