અમદાવાદ, તા. 11 : શહેરના રાણીપ અને શાહીબાગ વિસ્તારને જોડતા 52 વર્ષ જૂના સુભાષબ્રિજને તોડીને તેની જગ્યાએ 325 કરોડના ખર્ચે અત્યાધુનિક નવો બ્રિજ બનાવવાની કામગીરી પૂરજોશમાં શરૂ થઈ ગઈ છે. ડિસેમ્બર 2025માં બ્રિજના ડેકમાં તિરાડો અને સુપરસ્ટ્રક્ચરમાં સેટલમેન્ટ જોવા મળતા જાહેર સલામતીને ધ્યાને લઈને બ્રિજ વાહનવ્યવહાર માટે બંધ કરી દેવાયો હતો. હવે અમદાવાદ મ્યુનિસિપલ કોર્પોરેશન દ્વારા સમગ્ર બ્રિજનો પુનર્નિર્માણ પ્રોજેક્ટ હાથ ધરાયો છે.

કેમ તોડવો પડ્યો સુભાષબ્રિજ?

વર્ષ 1973માં બનેલો સુભાષબ્રિજ 453.75 મીટર લાંબો અને 12.85 મીટર પહોળો છે. 4 ડિસેમ્બર 2025ના રોજ બ્રિજના પિલર નંબર 9 ઉપરના સ્પાનમાં તિરાડો અને સેટલમેન્ટની ફરિયાદ મળતા તાત્કાલિક બ્રિજ બંધ કરવામાં આવ્યો હતો. ત્યારબાદ SVNIT સુરત, IIT રૂરકી અને IIT બોમ્બેના નિષ્ણાતો દ્વારા બ્રિજનું વિસ્તૃત નિરીક્ષણ કરાવવામાં આવ્યું હતું. નિષ્ણાતોના રિપોર્ટમાં જણાવાયું કે હાલના બ્રિજનું સુપરસ્ટ્રક્ચર સંપૂર્ણપણે તોડી પાડવું જરૂરી છે.

કેવો બનશે નવો બ્રિજ?

AMC દ્વારા આ પ્રોજેક્ટ EPC મોડલ હેઠળ બે તબક્કામાં પૂર્ણ કરવામાં આવશે. પ્રથમ તબક્કામાં હાલના બ્રિજનું જૂનું સુપરસ્ટ્રક્ચર તોડીને 38 મીટરના સ્ટીલ કોમ્પોઝિટ ગર્ડર સ્પાન સાથે નવું સુપરસ્ટ્રક્ચર બનાવવામાં આવશે. હાલના પિલરોને માઈક્રો-કોન્ક્રીટ જેકેટિંગથી મજબૂત બનાવાશે, સાત નવા પિલર ઉમેરાશે અને સ્પાનની લંબાઈ ઘટાડીને સ્થિરતા વધારવામાં આવશે. આ કામગીરી નવ મહિનામાં પૂર્ણ કરીને બ્રિજ ફરી વાહનવ્યવહાર માટે ખુલ્લો મૂકાશે.

બીજા તબક્કામાં ટ્રાફિકનું ભારણ ઘટાડવા માટે હાલના બ્રિજની બંને બાજુએ સમાન લેવલે બે નવા ટુ-લેન બ્રિજ બનાવવામાં આવશે. આમ ભવિષ્યમાં અહીં ફોરલેન બ્રિજની સુવિધા ઉપલબ્ધ થશે. સમગ્ર પ્રોજેક્ટનો અંદાજિત ખર્ચ 325 કરોડ રૂપિયા થશે અને બે વર્ષમાં કામગીરી પૂર્ણ કરવાનું આયોજન છે.

ડિમોલિશન કામગીરી શરૂ

સાબરમતી નદીને વાસણા બેરેજના ગેટ રિપેરિંગ માટે ખાલી કરવામાં આવી હોવાથી ડિમોલિશન કામગીરી માટે અનુકૂળ સમય છે. AMCના બ્રિજ પ્રોજેક્ટ વિભાગના જણાવ્યા અનુસાર, પ્રથમ તબક્કામાં છ સેન્ટ્રલ સ્પાન તોડવામાં આવશે. નદીમાં પાણી ન હોવાથી કાટમાળ નીચે પડવાથી કોઈ નુકસાન નહીં થાય. એપ્રિલથી જૂનનો સમય ડિમોલિશન માટે આદર્શ હોવાથી કામગીરી ઝડપથી આગળ વધારવામાં આવી રહી છે. નવો બ્રિજ બન્યા બાદ રાણીપ-શાહીબાગ વચ્ચેનો ટ્રાફિક વધુ સુગમ બનશે.